Vienan Karjala

Kirjutukset vienankarjalakse

Käsityön ihmehellini muajilma

Natalja Kuz’mina on hyvin tietty käsityön mestari Petroskoissa. Lapšešta hiän tykkyäy kutomista.

Mistä alko šiun kiinnoššuš käsityöh ta ken šiih vaikutti?

– Käsityöštä mie olen tykännyn ihan lapšešta šuahen. Kuin pitälti muissan iččie, aina olen luatin mitänih. Alušta iče yritin kekšie ta luatie mekkoja, vuatetta omilla kukkasilla. Šiitä koulun toiselta luokalta rupesin käymäh Luomistyötalon Pehmie kukkani -käsityökerhošša. Meijän luokkah tultih muasterit ta ilmotettih šemmosen kerhon avajaisista. Kerhošša harjottelin monta vuotta. Miun enšimmäisenä opaštajana oli Zoja Petrovna Gaidukova. Tietyšti, hiän vaikutti miun luovah mieleh ta kehitti nerojani. Nytki ušeičči keškusttelemma Zoja Petrovnan kera, hiän mielelläh auttau ta neuvou milma.

Oliko še šiun vakinaini harraššuš?

– Paičči Pehmie kukkani -kerhuo, rupesin opaštumah taitehkoulušša. Ka kahteh asieh aikua ei riittän ta šen vuokši muamon neuvon mukah valičin taitehkouluo. Onnakko koissa jatoin ommella ta luatie pienie kukkasie. Konša opaštumini taitehkoulušša loppu, niin tuaš myöššyin Zoja Petrovnan kerhoh šuuren puššin kera, missä oli äijän miun pikkutöitä. Opaštaja pitälti nakro, jotta miula aika ei männyn tyhjäh.

Mimmosie vaikutelmie jäi opaštajan työštä?

– Vaikutelmat oltih ylen mukavat. Enšin olin kirjonnan opaštaja, šiitä lisäsin opetukšeh lasihelmien punontua, tietyšti oli erilaisie käsitöitä. Lapšet mielelläh luajittih pehmeitä kukkasie. Šen lisäkši Linnašša oli pieni kutomakoneh, yrittimä ruatua šen kera. Pienien opaštujien kera tykkäsimä luatie origami-kukkasie.

Nyt šiula on oma Kuzart-työpaja, kuin pitälti še on toimin ta mitein ilmešty?

– Kuzart-työpaja on toimin jo vuuvven aikana. Pitälti huaveilin šiitä. Tiälä on olomašša kaikki, mitä mie tarvišen käsitöijen harjoittamiseh. Mie järješšän halukkahilla käsityökurššija. Näytän, mitä iče šuatan. Nyt muotissa on kintahien ta kuvien villanpunonta. Monet tykätäh tulkkutöistä.      

 

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat