Vienan Karjala

Kirjutukset vienankarjalakse

Ornamenttien simvolikielen harmonija

Irma Heiskanen ta Kaarina Kailo ollah varmat, jotta ikivanhua tietuo oppimalla ta pohtimalla ihmiset voijah piäššä harmonijah. // Kuva: Marina Tolstih

Šulakuun alušša šuomelaiset tutkijat Kaarina Kailo ta Irma Heiskanen vierailtih Petroskoissa. Naiset ošallissuttih kanšainväliseh seminarih, kumpani oli omissettu pukuistorijalla šekä ornamenttien simvoliikalla ta esitettih šiinä oman näkökulman käsitaitehen istorijah.

Tutkija-ekopsihologi Irma Heiskanen on jo 15 vuotta tutkin naisien käsitöijen visualista esi-istorijua ta ornamenttien kuvakieltä. Ornamentit ollah peräsin hyvin loittuota. Tuhanšie vuosie takaperin ihmiset ruvettih kuvuamah ornamenttiloissa omua elämyä, šyntymiseštä kuolomah šuate. Tutkijan mieleštä ornamenttien simvolikieli voit kertuo hyvin äijän ihmisien elämäštä ta kehitykšeštä. Še on iče asiešša visualista istorijua.

Akatemijatutkija ta kanšalaisaktivisti Kaarina Kailo on monie vuosie tutkin erilaisie naisien kyšymykšie, nimenomah naisih šuunnattuo väkivaltua, kunnivomurhie, rasismie, luontoh šuhtautumista.

Nykyjäh naiset toimitah yheššä, toteuttaen yhtehistä Myyttikehrä-projektie.

Ihmisien šuhtautumini luontoh ta toisihis on muuttun. Kaarlo ta Heiskanen väitetäh, jotta ihmisien mieli ei voi olla terveh, još ympärillä olija luonto tuhottuu:

– On ihan šelvä, jotta nykyjäh myö elämmä väkivaltaista kautta. Šuomeššaki melkein kaikki TV-ohjelmat ollah šotua: Muamojen šota, Läškišota, Kuorošota tnpp. Meijän kielenkäyttö on ihan militaristista.

Nykyni taloušmalliki on niin tuhosa, še vie kalat veještä ta tuhuou kaiken luonnon. Še ottau irti luonnošta kaiken, min šuau, eikä anna mitänä tilah. Nykysistä ihmisistä on tultu ahnehet kuluttajat, Kaarina pahekši.

 

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
Koudu: *
Partn`ourat