Vienan Karjala

Kirjutukset vienankarjalakse

Ypäyššuo – uuši rauhotušaloveh

Karjalan piämieš Aleksandr Hudilainen allakirjutti tašavallan hallitukšen piätökšen Ypäyššuo-rauhotušalovehen peruštamisešta.
Ypäyššuo on šuurin Karjalašša šuosisteemi. Rauhotušaloveh on peruššettu šitä varoin, jotta šäilyttyä monipuolisien karjalaisien šoijen tunturimallin.
Ypäyššuo šijoutuu noin 15 kilometrin piäššä Kalevalan piirin Kepa-pos’olkašta. Šen pinta-ala on yli 35 tuhatta hehtarie. Tämä šuuri šuoaloveh jatkuu yli 31 kilometrie pohjosešta šuveh päin.
Šuot näillä paikoin ruvettih muovoštumah yli 10 tuhatta vuotta takaperin Vienanmeren transgressijon (pinnan noušun takie). Nykyjäh Ypäuššuon alovehella šäilyy noin kolmen-nellän metrin pakšuset turvehkerroštumat.
Karjalan luonnonrikkahukšien käytön ta ekologijan ministerijön tietojen mukah, enšimmäistä kertua tämän alovehen šuojelomisen tarpehešta ilmotettih Karjalan Tietokeškukšen Luonnonšuojeluinstituutin laboratorijan ammattimiehet. Hyö oli valmissettu valtijollisen rauhotušalovehen peruštamisen tietehelliset peruštelut.
Tietojen analisi oli luajittu vuotena 2013. Šaman vuuvven lopušša Kalevalan piirineuvošto kiänty KT:n hallitukšen puoleh ehotukšella peruštua piirin alovehella Ypäyššuo-rauhotušaloveh.
Šuolla lašetah olovan 186 putkilokašvilajie šekä 67 šammal-lajie, monet niistä on merkitty Ruškieh kirjah. Tällä alovehella ollah pohatat karpalon ta hillon marjikot. Šen lisäkši on olomašša šuopuršun ta raaten lukusie populaatijoita. Šamoin šuosisteemillä on šuuri muuttolintujen populaatijon šäilyttämisen merkityš.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat