Vienan Karjala

Kirjutukset vienankarjalakse

Yksinäisien šyväimien koti

Alevtina Sem’onova (vaš.) jo monta vuotta on ruatan Kalevalan hoitokojissa. Hiän šuattau löytyä šopivat šanat jokahisella vanhukšella. // Kuva: Nadežda Vasiljeva

Vanhojenkoti avasi oveh kevyällä 1995 vuotena. Še oli enšimmäini vanhukšien hoitokoti Kalevalan piirissä. Vanhojenkojin johtajakši tuli L’udmila Gička. Šitä iellä L’udmila oli pitän aikua toimin Kalevalan lespromhosin ammattiliittokomitietan johtajana, hänellä oli hyvin äijän järještämiskokemušta ta mi on kaikista tärkein ikäihmisien vaikeukšet ta huolet ei konšana jätetty häntä välinpitämättömäkši. L’udmila staraičci luatie kaiken, jotta talon eläjät elettäis hyväššä hoijošša, turvašša ta rauhašša.
L’udmila Gička oli šeiččemen vuotta johtan Kalevalan vanhojenkotie. Naisen šanojen mukah ne oltih hänen elämäh onnellisimmat vuuvvet. Kuitenki naini šiirty elämäh toiseh paikkah ta šen takie mielusin työ oli jätettävä.
Tänäpiänä vanhojenkojissa eläy kolmekymmentä ihmistä. Monet niistä on eletty tiälä jo ušiempie vuosie. Ei niin ammuin Agafja Karpovna Pekšujeva juhli 90-vuotispäivyäh. Onnakko vanhojenkojin ijäkkähin eläjä on Olga Iosifovna Misevič, kumpani enši kešänä täyttäy 97 vuotta.
Hyväntahtoni ta šopusa Olga Iosifovna on kotosin Valkovenäjältä. Naini rikeneh muistelou omie kotipaikkoja, šotavuosie ta vihollisen miehitettyjä valkovenäläisie kylie. Muistelou, kun vahinkošta huolimatta kylän naiset autettih partisanija. Hiän nytki hyvin muistau niijen joukkojen komentajien nimet. Kohtalo šuatto Olgan meijän šeuvuilla. Tyttären kuoloman jälkeh, 2002 vuuvvešta naini on elän Kalevalan vanhojenkojissa. Olga valittau, jotta tervehyš ei ole enyä hiäppöni, heikokši on männyn. Eikä šiinä ole ihmettä noin korkiešša ijäššä ollen. Naini on ylen kiitollini vanhojenkojin ruatajilla hyväštä hoijošta ta huomijošta.
Šanotah, jotta vanhuš ei tuo mitänä iluo, erityisen konša ihmini jiäy aivan yksin. Kalevalan vanhojenkojin ruatajat staraijah luatie kaiken, jotta ikäihmisien elämä olis valosampi ta mukavampi. Tiälä aina šuurella ilolla otetah vaštah vierahie: olisko ne avuštajat Šuomen puolelta, kulttuuritalon ili Aurinko-sosialikeškukšen artistat tahikka nuoret pojat ta tytöt Kalevalan piirin nuoriso -liikkeheštä. Vierahien käynnit lisätäh värijä ijäkkähien ta yksinäisien ihmisien yksitoikkoseh elämäh ta annetah toivuo, jotta hyö tavatah uuvveštah.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat