Vienan Karjala

Kirjutukset vienankarjalakse

Piämies dorogoih da ekonoumiekkah näh

Aleksandr Hudilainen ei tovendannuh paginoi omua Karjalan piämiehen virraspäi lähtendiä: vuvvekse 2015 b’udžietan pluanas ei ole nimidä valličuksien kululois. // Kuva: Ol'ga Smotrova

Enzimäzii kyzymyksii oli kyzymys Karjalan da Suomen yhtevyksis nygözes ekonoumiekkutilas.

– Meijän yhtevykset ei pahettu, meijän yhtehine ruado suomelazienke jatkuu kaččomattah sanktsieloih. Ligakuus Jevrokomissii hyväksyi 23,6 miljonan jevron grantan Suomen da Karjalan yhteisruadoh. Nämä jengat myö suammo Jevroupan Liitospäi vuodessah 2020, sanoi piämies.

Hudilainen ližäi myös, ku suomelazet ruvettih aktiivizembah kehittämäh omua biznessua Karjalas, on heil jo hyviä projektua meččyalal.

Mi koskou Jevroupan Liiton sanktsieloi Ven’ua vastah, net, tiettäväine, ei roita Karjalan ekonoumiekan hyväkse. Ga sih kaččomattah täsgi on hyvyön jyvä: Karjal on tazavaldu-eksport’ouru, sendäh laitokset, kudamat myvväh oma tuotando Suomeh, suajah nygöi enämbi jengua, jevrohäi kallistui.

Kuningastu käskyläzien myöte arvostetah

Lehtimiehet opittih sellittiä, mi hoppu rodih Karjalan piämiehen Hudilazen da Petroskoin piälikön Galina Širšinan välis. Da ongo se tottu, ku piämies moittiu Širšinan ruaduo linnan emändänny.

Aleksandr Hudilainen sellitti, ku pahoi arvosteluloi Širšinale annetah iče rahvas, petroskoilazet. Jo puolentostu kuun aigah Petroskoin bol’ničat ollah tävvet rahvastu – lumes aijoilleh kabrastamattomil da libielöil linnan dorogoil rahvas katkatah iččeh luut. Hudilazen mugah, Petroskoin piälikön viga on sit, ku häi ottau ruadoh ei maltajii, a lähembäzii. Kuningastu käskyläzien myöte arvostetah...  

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat