Vienan Karjala

Kirjutukset vienankarjalakse

Talvi ei ole talvi ilmain lunta

Mukavat viestikilpailut tuotih intuo ta iluo kuin ošallistujilla šamoin kaččojillaki. // Kuva: Olga Melentjeva

Muajilman lumipäivä ili Word snow day alotti oman istorijah ei niin ammuin. Pruasniekka oli kekšitty vuotena 2012 Kanšainvälisen hiihtourheiluliiton alottehešta.  Lumipäivyä juhlitah jo monissa maissa. Tänä vuotena tämä talvipruasniekka oli enšimmäistä kertua järješšetty Karjalaššaki.
Puolenpäivän jälkeh Petroskoin Gorka-urheilukeškukšen alovehella keräyty äijän rahvašta. Pruasniekkaohjelman avattih alppihiihto- ta lumilautailukilpailut, kumpasissa omua neruo näytettih lapšet ta nuoret.
Pruasniekan järještäjät oli kekšitty kaikenmoisie huvija kuin lapšilla šamoin aikuhisillaki. Ohjelmašša oli esimerkiksi curling-tyyppini lumiliukurikilpailu, esterata ta labirintti,  šekä harjapallo-otteluja. Perehjoukot ošallissuttih viestikilpailuih. Pienemmät lapšet kokeiltih voimieh juokšupyörän ohjuamisešša. Päivän aikana oli šamoin järješšetty lautailun ta acroski-taijon (hiihtobaletin) muasteri-oppija. Noin 150 lašta oli ošallistun päivän aikana eri kilpailuih ta muasteri-oppiloih. Pruasniekan lopušša kilpailujen voittajat šuatih palkintoja ta lahjoja. Järještäjät luvatah, jotta enši vuotena lumipäiväštä tulou äijyä luajamittasempi tapahtuma ta toivotah, jotta jatkošša šiitä tulou hyvä perinneh.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat