Vienan Karjala

Kirjutukset vienankarjalakse

Kyykkä kouluh

Yheššä päiväššä seminarin ošanottajat šuatih teorettisie tietoja kyykäštä ta ičeki kuoteltih lyyvvä kyykkie urheilukentällä. // Kuva: Natto Varpuni

Priäžäššä piettih kyykkä-seminari, minne kučuttih koulujen opaštajat Karjalan kanšallispiirilöistä ta vepšäläisistä kylistä. Pivon tarkotukšena oli kertuo opaštajilla kyykäštä, näyttyä tätä pelie ta levittyä šitä kouluih.
Seminari oli järješšetty Priäžän piirin Nuorusvägi-järještön Kyykkä kouluh -projektin yhteyveššä. Yheššä päiväššä seminarin ošanottajat šuatih teorettisie tietoja kyykäštä ta ičeki kuoteltih lyyvvä kyykkie urheilukentällä.
Olga Nikitina, Kotkatjärven koulun opaštaja:
– Mie tulin tänne opaštumah peluamah kyykkyä. Iče opaššun ta šiitä opaštan lapšie. Meijän kyläššä ei ni vouse tiijetä kyykäštä. En muissa, jotta šitä pelattais ta vanhat rahvaš šiitä kerrottais.
Monešša Karjalan kyläššä kyykkä on jo hyvin tuttu rahvahalla. Kyykkäkilpailuja pietäh Kalevalašša, Petroskoissa, Vieljärveššä, Kontupohjašša. Ka monešša kyläššä tämä peli on tähä šuate ollun tuntemattomana. Kyykän muasterit kerrottih pelin šiännöistä, kentän piiruštamisešta ta pelin muistaki tärkeistä as’s’oista. Projektin ideja on šuaha kyykkä koulujen ohjelmah ta pelata šitä liikuntatuntiloilla. Täššä on tärkeintä enšin kiinnoštua opaštajie, a šiitä hyö iče šuahah lapšet pelin puoleh.
Zoja Sorokina, Kenttäjärven koulun opaštaja:
– Myö jo puolitoista vuotta olemma pelannun kyykkyä. Še peli oikein meilä miellyttäy. Ihmiset oikein hyvin otettih vaštah šen kuin koulušša šamoin ni kyläššä. Tulin tänne šuamah enemmän tietoja kyykäštä ta kyllä tahtosin, jotta še peli ois otettu koulun ohjelmah.
Seminarin lopušša kyykän aktivistit paistih yhtehisistä šuunnitelmista ta proplemoista šekä kačottih yhtehisen kyykkä-kalenterin luatimista.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat