Vienan Karjala

Kirjutukset vienankarjalakse

Karjalan tašavalta täytti 95 vuotta

Karjalan Runonlaulajat gala-konsertissa oli pietty 15 laulu- ta teatteriesityštä // Kuva: Alina Čuburova

Jo kolmatta vuotta Karjalan eläjät ta vierahat on juhlittu tašavallan päivyä ei piäkaupunkissa Petroskoissa, ka piirien piäpaikoissa: vuotena 2013 – Priäžäššä, 2014 – Kontupohjašša. Tänä vuotena Karjalan Tašavallan 95-vuotisjuhla piettih Sortavalan kaupunkissa. Šemmosen perintehen alotti Karjalan piämieš Aleksandr Hudilainen. Šillä tavalla viranomaiset tahottais kiinnittyä enemmän huomijuo muakuntoih, vet’ valmistamisih mänöy koko vuosi, šiih on šuunniteltu erikoini rahotuš Karjalan b’ydžetistä.   
Yhekši päiväkši Sortavalašta tuli Karjalan piäkaupunki. Tuhannet ihmiset Petroskoista ta Karjalan piirilöistä šekä muista Venyähen alovehilta ta ulkomailtaki tultih pruasnuimah ta kaččomah muutokšie, kumpaset on tapahuttu kaupunkissa.
Šuurista vierahista vois mainita Venäjän turvallisušneuvošton šihteerin ta Karjalan Tašavallan 100-vuotisjuhlan valtijon valmistamiskomiisin piälikön Nikolai Patruševin. Juhlan puittehissa Patrušev ta Hudilainen ošallissuttih Onegajärven laivatehtahan avajaisih Petroskoissa ta kerittih helikopterilla Sortavalah šuuren juhlan avajaisih.
Pruasniekkapivot rajakaupunkissa alettih jo aikaseh huomenekšella, monissa paikoissa. Koko šuuri kaupunkikeškušta oli juattu alovehih ta jokahisella vierahalla, aikuhisella tai lapšella tai koko perehillä riitti kačottavua, nähtävyä, kokeiltavua, nakrettavua, tanššittavua, oššettavua, urheiltavua. Joka tašavallan piiri ošallistu šuureh näyttelyh ta esitti omie kykyjä ta varoja. Koko Karjalašta tuli tanšši- ta lauluryhmijä, kumpaset esitettih eri pruasniekan alovehilla.
Yksi šuurimmista ta kiinnoštuvimmista oli Karjalan Runonlaulajat -gala-konsertti, kumpani oli omissettu Kalevala-eepossan 180-vuotisjuhlalla. Konsertin puittehissa oli pietty 15 laulu- ta teatteriesityštä: Čičiliušku-kuklateatteri esitteli Koirien Kalevala -spektaklin pienen ošan, Pekka Huttu-Hilttunen Kuhmošta laulo runon Lemminkäiseštä, Raisa Zaprudskaja Koštamukšešta joiku, Talomerkit-folkryhmä Piiteristä esitti perintehellisie lauluja inkerin ta šuomen kielillä, Zinaida Ust’ugova luki runoja Kalevalašta.
Tulijana 2016 vuotena Karjalan Tašavallan päivän juhlapitoja järješšsetäh toisešša rajakaupunkissa Koštamukšešša.  
Nyt Sortavalan kaupunki on vuottamašša toista šuurta kanšainvälistä tapahtumua – Sortavalan Laulujuhlat, kumpani pietäh 3.–5. heinäkuuta.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat