Kinnas – vuozipäivyniekku

Jo huondestu myöte Kindahan kyläh rubei kerdymäh rahvastu. Mašinua, rahvastu, artistua huškuajua pruazniekkusovissah oli kylläl. Kylläl oli luajittugi pruazniekan programmah niškoi. Sen luadijat nägyy hyvin ruattih, azuttih hyvä da monipuoline ohjelmu pruazniekkurahvahah niškoi...

Uvven jällil

Tämän hantuzis festivualin luadijat tahtottih azuo äijän uuttu, muuttua vähäzel pruazniekan programmu. Se heile lykysti. Jo enzimäine uvvistus sen järjeständäs oli se, ku enzi kerdua festivuali piettih Priäžän piirin administratsien da yhteiskunnallizien liittoloin vuoh. Melliččy-fondu, kudamas ruatah nuoret rahvas, täs ruavos oli edupiäs. Heijän mielii da nägemyksii festivualin piendäh niškoi sai nähtä pruazniekas iččenäh.

Pruazniekkupiän Kindahan kylä oli juattu monih aholoih da tanderih. Yhtes omua tavarua da luajilmustu myödih meigäläzet neroniekat da vie opastettih, kui sidä libo tädä voibi azuo. Rahvas, ken kehtai, ga opastuttih kudomah, savie ”punomah”, villua kataimah da muudu ruadamah...