Vienan Karjala

Kirjutukset vienankarjalakse

Ahkeran emännän piha

Lidija Černišenko näytti omilla pienillä vierahilla uutta riikinkukkuo. // Kuva: Lidija Černišenkon pereharhiivašta

Lidija Černišenko šynty ta kašvo Kemin piirin Äynyäkošešša. Jyškyjärven kyläh naini muutti Nikolai-mieheh kera 1967 vuotena. Nyt pariskunnan lapšet on jo kašvettu ta eletäh Koštamukšešša omien perehien kera. A eläkeläiset Lidija Ivanovna ta Nikolai Stepanovič jiätih Jyškyjärveššä, vet kyläššä heilä on oma talo ta pihapelto. Pariskunnan kašvitarhašša on monta korissuš- ta marjapenšahta. Potakkapellon lähellä kašvetah eri kašvikšet.

Noin viisi vuotta takaperin Lidija Černišenkolla ilmešty uuši haraššuš – naini alko opaštuo luatimah omin käsin eri kuvijoja pihan koristamista varoin. Lidija eččiy mallija internetistä, a tarvittavie materialija aina voit löytyä ruhkakašoista.

Nyt emännän pihašša ”kašvetah” pal’mat ta ”eletäh” vakava hirvi ta vesselä slona, hyväšiämini krokotiili ta vieno joučen, tunnettujen starinojen šankarit ta monet muut elukat.

Jotta luatie šuuri kuvijo, enšin pitäy kerätä šen runko lautojen kappalehista. Šiitä vartalo vuoratah vuahtimuovilla ta šen piällä vejetäh kumi, kumpani pitäy värjätä mualilla.

– Enšin mie opaššuin piiruštamah ta korissin omilla piiruššukšilla kaikki pihašeinät, kertou Lidija Ivanovna. – Šiitä tuli ajatuš luatie šemmosie kuvijoja, jotta kuin elävät elukat šeisottais miun kašvitarhašša. Hirven ta slonan mie luajin ruttoh, olis vain materiali. Pal’moja niise on helppo luatie, kiät vain vaivutah muovipulloja leikkuas’s’a. Nikolai auttau milma, konša tarviččou miehen voimua, luatiu kuvijojen runkoja.

Tuanoin Lidijan kašvitarhašša ilmešty kaunis värikäš riikinkukko. Šen levie hähtä on luajittu leikatuista erivärisistä muovipulloista. Riikinkukkuo vielä ei nähty lapšet ta punukat, ka kohta hyö tullah vanhempieh luo lomalla ta šuahah ihailla uutta kummua.

– Monet ihmiset käyväh miun kašvitarhah kuin musejoh, kačellah kuvijoja ta kuvatah niitä, hyvekšitäh milma, muhiu Lidija Ivanovna. – Še on miula parahana palkintona miun lempi harraššukšešta.

Talon piha on oikein mukava ta kaunis. Onnakko Lidija Černišenkolla on vielä monta šuunnitelmua. Ta varmašti ahkeralla emännällä kaikki onnistuu.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat