Šammon muata myöten

Maratoni, kumpani kuuluu Muajilman maljan etappih, piettih Petroskoissa jo toista kertua.
– Tämän mukavan urheilulajin šuosijo kašvau vuosi vuuvvelta, korošti kilpailujen avajaisissa Karjalan piämieš Aleksandr Hudilainen. – Olen varma, jotta Karjala voit vuatie vakavimpienki valjakkokilpailujen järještämistä kuin Muajilman ajourheilun meštarikilpailuja.
Tänä vuotena kilpailuh ošallistu 120 urheilijua Karjalašta, Venäjän eri kaupunkiloista, Čekistä, Šuomešta, Slovakijašta, Valko-Venäjältä. Erirotuset koirat – haskit, metisit, malamutit ta muut – mitailtih voimieh kilpailun kahešša lajissa, sprintissa ta keškivälimatašša.
40 kilometrin ajošša, 8–12 koirien valjakkokilpailušša, voitti kokenut ajaja Mihail Šelkovin Moskovan alovehelta. Niin kuin ni viime vuotena kuuvven koiran valjakko-ajoissa voitti čekki Martin Vrtel’. Urheilija Šuomešta Vesa-Pekka Lehtomäki voitti nellän koiran valjakko-ajošša, a Marija Korol’ Piiteristä šai enšimmäisen paikan kuuvven kilometrin ajošša yhen koiran kera.