Runonpajattajat opitah vägie kilvas

Tänävuon rodieu 180 vuottu kuulužan karjalas-suomelazen Kalevala-eeposan enzimäzes painandas. Kalevalan päiväkse Karjalan kul’tuuruministerstvu da Kanzallizien kul’tuuroin keskus ilmoitettih Runonpajattajien kilbu.

Yhtyö kilbah suau yksin hengin dai joukolleh. Kilvas on kaksi nominatsiedu: perindölline runon libo starinan pajattamine da stilizatsii – uudeh luaduh pajattamine.

Kilbahpakičuksii da videomaterjualoi kilbah työndäkkiä tuhukuun 28. päivässäh sähköpoštale cnk-karelia@yandex.ru (kirjazeh pangua ven’akse merki “Na konkurs”) libo adresile: 185035, Petroskoi, Leninan lagevo, 2, Kanzallizien kul’tuuroin keskus. Voittajat roitah ilmoitettu Kanzallizien kul’tuuroin keskuksen saital www.etnocenter.ru kevätkuun 6. päivänny.

Ližiä tieduo telefonas 8 (8142) 78-20-48, 76-46-89.

Mustakkua täyttiä da työndiä kilbah kilbahpakičusgi. Se löydyy http://vk.com/omamua -internet-sivun dokumentois.  

Fakta: Kilvan ehtot

Videomaterjualu ei pie olla pitkembi 15 minuuttua.

Video pidäy olla WMA, WMV, MP4, AVI, MOV libo MPG -formuatas.

Kilbuniekkoi ruvetah arvostamah:

– pajatandan neroloi myöte;

– kielineroloi myöte;

– ruttii, muuzikkusoittimii da toizii nähtävyksii myöte;

– akt’ouran neroloi myöte.

Kilvan vottajat kučutah ezittymäh Karjalan tazavallan vuozipäivykonsertah Sortavalah 6. kezäkuudu.