Vienan Karjala

Kirjutukset vienankarjalakse

Merkkipäivän uattona

Merkkipäivällä omissetut toimehpivot aletah tämän vuuvven 21. šyyškuuta – Kantele-talošša pietäh yhtyvehen solistin, Karjalan anšijoitunuon artistan Tatjana Peron’ luomisikonsertin.

Šitä ennein, heinäkuušša, elokuušša ta šyyškuun enšimmäisellä puolella, Kantele-talošša on järješšetty uuši Musiikkikortti-konserttiohjelma. Šiih kuulutah tunnetun kollektiivin parahat laulu-, musiikki- ta tanššiesitykšet, kumpasien pohjašša ollah tašavallan kantaeläjien kanšalliset perintehet. Karjalaista ta vepšäläistä, šuomelaista ta inkeriläistä, pomorilaista ta oneganiemiläistä (заонежский) musiikkie, lauluja ta tanššija esitetäh orkesterin šoitinryhmä, Aino-vokaliryhmä šekä kollektiivin balettiošašton tanššijat ta šen solisti, Karjalan anšijoitunuon artista Irina Popova. Konsertin lopušša artistat lauletah piiteriläisien luatijien Aleksandr Kolkerin ta Kim Rižovin tunnetun Karjala-laulun karjalan ta venäjän kielillä.

Šen jälkeh kaččojie vuottau s’urpriisi: oppimatka Kantele-taluo myöten, kumpaista vetäy yhtyvehen marketingi-ošašton ruataja Aleksandra Saharova. Enšin kävijät tutuššutah Kantele-talon rakennukšen istorijah, missä Šajekuun vallankumoušta ennein oli naisien gimnasija. Šiitä oppimatka jatkuu toisella kerrokšella olohuonehešša. Šielä on esitetty Kantele-kollektiivin peruštajien kuvanäyttely: yhtyvehen alkuhpanija Viktor Gudkov, horeografi Vasili Kononov, solistit-kantelistit Maksim Gavrilov ta Toivo Vaimonen, 1960–1980 vuosien orkesterin piäjohtaja Lev Kosinski.

Kolmannella kerrokšella kävijät voijat tuttavuštuo Kantele-kollektiivin artistojen konserttipukujen eskiisiloih, kumpasie piirušti petroskoilaini taiteilija Alla Vlasenko šekä niijen pukujen malliloih.

Šamoin kolmannella kerrokšella oppimatka viey kaččojie kahteh verštahah. Yheššä ommellah konserttipukuja, a toisešša tunnettu muasteri Aleksandr Frolov luatiu šoittimie yhtyvehtä varoin: kanteleita, jouhikkoja ta muita. Varštahissa opaš kertou Kantele-kollektiivin lapšien ta nuorison studijon toiminnašta šekä kanteleterapija-harjotteluista, kumpasie pietäh invalidi-lapšija varoin.

Oppimatan lopušša vierahat laškeuvutah enšimmäiseh kerrokšeh peittoportahie myöten, kumpasen onnistu löytyä Kantele-talon rakennukšen rekonstruoinnin aikana.

Jo on tiijošša päivä, konša Karjalan Musiikkiteatterissa pietäh Kantele-yhtyvehen 80-vuotispäivällä omissettu šuuri juhlakonsertti – še päivä on 11. talvikuuta 2016.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat