Vienan Karjala

Kirjutukset vienankarjalakse

Kuni myö tykkyämmä, myö elämmä

Näyttelyn luatijina ollah kolme yštävyä L’ubov’ Krašakova (vaš), Marija Gončarova ta Irina Sandovskaja. Näyttely on naisien enšimmäini yhtehini projekti. // Kuva: Ilona Veikkolainen

Näyttelyn luatijina ollah kolme yštävyä Irina Sandovskaja, L’ubov’ Krašakova ta Marija Gončarova. Näyttely on naisien enšimmäini yhtehini projekti.

Irina Sandovskaja on kotosin Viipurista. Nyt hiän jo yli kymmenen vuotta eläy Šuomešša. Ammatiltah Irina on šairahienhoitaja.

– Piiruššuš on miun elämän piäharraššukšena. Mie piiruššan koko elämän. Enšin mie en pitän tätä harraššušta tosieh. Šiitä, konša muutin Šuomeh ta miula ilmešty enämpi vapuata aikua, niin ymmärrin, jotta en voi kuvitella omua elämyä ilman piiruššušta, kerto Irina Sandovskaja näyttelyn avajaisissa.

Vuotena 2012 taiteilija opaštu mualauštaijon kurššiloissa ta šen jälkeh rupesi piiruštamah melkein joka päivä. Tämä näyttely on nelläš, kumpasešša taiteilija näyttäy omie töitä. Irinan šanojen mukah, kuvien avulla hiän antau kaččojilla oman šielun lämpyö, valuo ta hyvyä tarmuo. Taiteilija enemmän tykkyäy kuvamualautta.

Näyttelyn toini ošallistuja on kemiläini L’ubov’ Krašakova. L’ubovin harraššukšena on valokuvuamini. Omie enšimmäisie valokuvie L’ubov’ rupesi ottamah jo koulušša. Šiitä tämä asie oli melkein unohettu, piti ruatua, kašvattua lapšie.

Kemiläisen valokuvuajan enšimmäini näyttely oli pietty vuotena 2014 Kemin kirjaštošša, a vuotena 2015 L’ubovin valokuvat oli painettu paikallisešša leheššä ta Petroskoissa oli järješšetty yksityini näyttely.

L’ubov’ ta Irina tutuššuttih netissä: hyö molommat opaššuttih online-akademijašša.

Näyttelyn kolmaš luatija on Marija Gončarova niise Kemistä. Jo monta vuotta Marija ruatau koulušša käsityön opaštajana. Kemin eryähäššä näyttelyššä L’ubov’ Krašakova näki Marijan töitä – dekoratiivisie kyynttilöjä – ta heti mielty niih.

Naiset mielelläh lahjotetah elämän omie näkökulmie ta taitehen kaunehutta näyttelyn kaikilla kaččojilla ta toivotah, jotta šemmoni näyttely ei ole viimeni.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat