Vienan Karjala

Kirjutukset vienankarjalakse

Mennyön da nygözen välis

Tunguon kylä seizou lammen rannoil. // Kuva: Ol'ga Smotrova

Sih välih puutuimmo järvie myöte soudajes. Tuakse jäi kasan nägöine suari – rahvahas sanottu Kodišuarekse. Sie on igivahnat sangiet hongat – kuolluot, liikkumattomat. Min verran karjalazen rahvahan polvie hyö nähtih – tulou vai arvata. Suaren agjal on puolitostu vuozisadua tagaperin elänyzien karjalazien kalmua grobničoinke, kuduat ei vie hapattu kogonah. Iel on randua pitkin nostettu kylä – Šuigärvi libo Šuikujärvi. Talvekse kyläh jiäy vähembi kymmendy hengie, kezäl kylä elbyy. Koit ollah enimite vahnat, erähis jäi laho parzitukku.

Šuikujärven kaiččijat

Kyläs meidy kahtu liygilästy da yhty tunguon karjalastu vastattih hyvin, mielihyväl saneltih sit, midä mustoh jäi endizes elaijas.

Paistes kielikynnysty ei olluh, liygilästy ellendettih enzikerras. Ei ellendetty vai, a “maltettih”, meijän niegluo-sanan sijah käytettih “tikuttua”. Eloksen tavas paistes sellitimmö, vienankarjalazet tottu ei kuvottu hurstiloi, sikse ei ni säilynyh heile kangaspuuloi. Lattieloile pandih verkoloi, ku reduu niilöih tartus, šipainikoin-kalittoin syväimekse paiči kartohkua da brossua pandih muarjuagi – buolua da must’oidu...

Matkan enzipäivänny puutuimmo paginale Jelizaveta Saveljevna Andronovanke. Naine on niilöi, ket eletäh kyläs ymbäri vuvven. Hänen kodi – miehoilu – on suuri, kaksikerroksine, talvel yksinäh eläjes emändy lämmittäy vai alahal. Lämmäl syvyspäiväl pagizimmo pihas, kuundelemah muaman sanelendoi tuligi hänen karjalakse maltai, nygöi Moskovas eläi poigu.

Jelizaveta Saveljevnas tiijustimmo, kui voinan jälles rahvas elettih kyläs. Häi saneli, kui piettih svuad’boi da kyläpruazniekkoi. Šuikujärven kyläpruazniekku on Il’l’anpäivy, 2. elokuudu, pruazniekkah kerdyi rahvastu lähikylispäi. Toizennu piän, 3. elokuudu, Il’l’anpäiviä piettih Lehol, kaikin kerryttih jo sinne. Tunguoh lähtiettih pidämäh iluo 28. elokuudu.

– Pruazniekkupäivinny nurmikole pandih čurkat, ket niilöil istuttih, ket omua stuulua koispäi tuodih. Pläšittih äijän, mustelou Jelizaveta Saveljevna... 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat