Vienan Karjala

Kirjutukset vienankarjalakse

Kalevala. Uuši kačahuš eepossah

Šuomelaisen taiteilijan Kari Södön puušta luajittu Pohjola-objekti // Kuva: Jelena Maloduševa

Uuši näyttely näyttäy mitein monien vuosien aikana on muuttun taiteilijien näkömyš Kalevalah. Näyttelyn pohjana on Karjalan Tašavallan Taitomusejon kokoelma, kumpani alko muovoštuo 1960-luvulla. Šuurin oša niistä töistä on grafiikkua. Šiinä on näytetty Venäjän ta Karjalan tunnettujen taiteilijien teokšie, ešimerkiksi Tamara Jufan, Georgi Stronkin, Myd Mečevin töitä. Uuši näyttely, kumpaseh ošallissuttih nykyaikaset taiteilijat, näytti, jotta kiinnoššuš eepossah nykyjähki vaikuttau ta innoššuttau taiteilijie uušien taitehmuotojen eččimiseh.
– Miula on šuuri ilo tervehtie kaikkie näyttelyn avajaisissa. Aika näittäy, jotta myö aina myöššymmä meijän alkulähtehih ta juuriloih. Näyttely oli merkitty projektina Venäläis-šuomelaisešša forumissa. Paičči uušie töitä, voitta nähä Kalevalan klassikkoteokšie. Teitä vuottau mukava šeikkailu Kalevala-eepossan teokšien mukah, Taitomusejon johtaja Natalja Vavilova kerto näyttelyn avajaisissa.
Kalevala. Uuši näky -näyttely on kanšainvälini projekti. Šuomen Oulu, Joensuu ta Rovaniemi ollah Taitehmusejon yhteistyönpartn’orit.
– Vuosien aikana Karjalan Tašavallan taitehmusejolla on kehittyn kiinteitä yhteistyöšuhteita Šuomen Pohjois-Pohjanmuan kera. Vuotena 2011 Taitomusejošša oli pietty Vuokko Isakssonin näyttely. Šilloin hiän opašti meijän naisilla tilkkutyötehniikkua. Kurššijen alušša Vuokko šano: Unohtakkua kaikki propleemat, rupiemma luomah, muisteli Natalja Vavilova.
Paičči kuvie näyttelyššä on esitetty veissokšie, valokuvie, videjotöitä, taitehellisie objektija ta instal’l’atijoita.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat