Vienan Karjala

Kirjutukset vienankarjalakse

Opaššu, kuuntele, pakaja

Paginkanzu-klubin ošallistujat kuččuvierahan Andrei Gorškovin kera. // Kuva: Natalia Vorobei

Tavan mukah Paginkanzu-klubin rahvaš ruvetah keräytymäh kakši kertua kuukauvešša šamašša paikašša – Kanšallisien kulttuгrien keškukšešša ta šamah aikah (joka toini nelläšpäivä, klo 17.30) Klubi ruatau oraškuun loppuh šuaten. Šen emäntä Natalia Vorobei kuččuu Paginkanzun illaččuloih kaikkie, ketä kiinnoštau karjalan kieli ta karjalaini kulttuuri.
– Petroskoissa eläjät karjalaiset tahotah paissa omalla kielellä ta myö taričemma heilä šen mahollisuon, Natalia kertou. – Tavallah klubin illačču keštäy puolitoista tuntie. Ka tämä ei ole oppitunti, vain elävä pakina čäijystolan takuana epävirallisešša ilmapiirissä. Joka kerta mie kučun gostih tunnetun ristikanšan, kumpani kertou ičeštä, omašta pereheštä, ruavošta ta šiitä, mistä vain tahtou.  Myö kaikin kuuntelemma häntä tai kyšymmä häneltä mitänih lisyä, mitä tulou mieleh pakinan aikana. Esimerkiksi, viimekši meilä gostissa oli karjalaini räppäri Andrei Gorškov (Ondrei). Myö yheššä lukima hänen räppie ta illačun aikana klubin kävijä runoilija Tamara Šherbakova kekši oman runon räppi-tyylissä ta luki šen kaikilla kuunneltavaksi. Se oli ihana!
Klubissa on ainut šiäntö – pitäy paissa vain karjalakši. Tänne tulou livviläisie, vienalaisie tai lyydiläisie. Hyö hyvin ymmärretäh toini toistah. Jokahisella on mahollisuš paissa karjalakši. Tämä pakinakerho niise on hyvänä apuna karjalan kielen kurššien opaštujilla.
– Monet aikuhiset, ket opaššutah kieltä, ollah ujot ta varatah avata šuut ta šanuo hoti pari šanua karjalakši, ka heilä on tahto kuunnella ta opaštuo kieltä enämmän ta olla karjalaisien kešen. Tapuamiset pakinakerhošša annetah heilä varmutta omih voimih ta omah kielitaitoh ta hyö ičeki ruvetah pakajamah karjalakši. Kerhon illaččuloissa rahvaš vielä šuahah painettuo materialie – karjalankielisie tekstijä, runoja ta lauluja. Tätäki ainehistuo hyö voijah käyttyä kielen opaššukšešša.

Šeuruava illačču on 29. šajekuuta. Piäšy on ilmaista. Lisätietoja klubin ruavošta kaččokkua täššä: https://vk.com/paginkanzu

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat