Nuorin Lumineitoni Kalevalašta

Tänä vuotena Karjalan Lumineitoni -kilpailuh keräyty ošallistujien rekordimiärä – 31 neičyttä, a valkovenäläisen ošanottajan anšijošta Karjalan Lumineitoni -festivali tuli kanšainvälisekši.
Enšimmäistä kertua meččätaikurit, lumikaunottaret ta vesselät tyttöset esiinnyttih kolmešša ikäryhmäššä. Kaikista nuorimmat 8–13-vuotiset ošallistujat esitettih luatijanpukuja, luvettih runoja ta ošoitettih uuvvenvuuvven arvautukšie. A 14–25-vuotisien Lumineitosien piti valmistua puku kuin ičellä, šamoin ni ičenluatimalla kuklalla, kumpasen presentatijo oli pietty kilpailun enšimmäisenä päivänä. Pakkaisukon yli 25-vuotiset punukat esiinnyttih Neiti Talvi -kilpailukategorijašša: nellä šuloista neičyttä näytettih muasteri-oppija, kumpasissa esitettih mitein luatie uuvvenvuuvven šuojeluesineh ta leikittih auditorijan kera vesselöih kisoih.
Juhlalliset avajaiset, Uuši vuosi on kynnykšellä -kilpailu ta Snego-pati-leikkiohjelma piettih kilpailun enšimmäisenä päivänä kolmella kentällä. Nuoriso-kulttuurikeškukšešša ta Lapšen ta nuorison luomistalošša Lumineitoset kerrottih ičeštä. Šiitä Lotos Siti -kauppakeškukšešša kahen tunnin aikana neiččyöt yheššä Pakkaisukon kera leikittih nuorien kontupohjalaisien kera, näytettih mitein šuatetah vesseliytyö ta lahjottua iluo toisilla.
Kaunehuon ta neron Karjalan Lumineitoni 2015 -kilpailun tulokšet ilmotettih illalla gala-konsertissa. Kilpailun piävoittajakši piäsi Anna Kohanskaja Segežašta.
Šamoin voittajie valittih ni eri ikäryhmissä. Festivalin nuorimmiksi voittajiksi tultih Sofja Nikutjeva Kalevalašta ta Viktorija Koppalova Kontupohjašta.
14–25-vuotisien Lumineitosien ryhmäššä voitti Svetlana Trifonova Šuojärveštä, a Laina Perttunen Koštamukšešta, Irina Mitina Karhumäještä, Anastasija Volkova ta Darja Muraškevič Kontupohjašta šuatih erikoispalkinnot. Lahjoja šuatih ni Neiti Talvi -kategorijan ošallistujat: Tamara Bol’šova Minskista, Jelena Zaiceva Petroskoista, Marina Zapertova Segežašta ta Ol’ga Kostina Šuojärveštä.
Kilpailun kaikki voittajat ta diplomantit šuatih diplomija ta lahjoja festivalin järještäjistä, sponsoriloista ta partn’oriloista.