Vienan Karjala

Kirjutukset vienankarjalakse

KIELIPEZÄ: fantastiekku vai realižus Karjalan Tazavallas?

Mennyt vuon Karjalan Rahvahan Liitto järjesti Petroskois pyhänpäivän kielipezän. Projektan mugah lapsile ommeltihgi XI -vuozisuan karjalazet ruutat. // Kuva: Ol'ga Smotrova

Se teemu otetah paginal Petroskoil 24. tuhukuudu. Pido on avvonaine.

Kanzalaisliitot Karjalan Rahvahan Liitto da Nuori Karjala kučutah pidoh, kudaman azutah kahten kallehen mieros piettävän päivän čottah. Ezmäine on Kanzoinväline Muamankielen Päivy (21.tuhukuudu), toine – Kalevala-päivy (28. tuhukuudu).

Taritah kaččuo yhtes Suomen puolel luajitun “Kielâpiervâl” (inarinsaamen kielel ”kielipezä”) – fil’mua da kačondan jälles livuttua pagin kielipezis. Mustoitammo, ku Suomen saamelazet allettih jalloittamah omua kuolendukuvil olijua kieldy juuri kielipezän vuoh, konzu saamen kielel ruvettih pagizemah lapsil päivykois. Fil’mu luajittih suomenpuolizet kieliaktivistat, juuri niilöih rahvahih niškoih, kuduat tahtottas tiijustua, mibo se on tovelline kielipezä. Fil’man kielet ollah inarinsaami da suomi, subtitrat ollah ven’ankielizet. Dielon kannatti Juminkeko-fondu ECHO-projektan hantuzis.

Karjalan Rahvahan Liitto da Nuori Karjala tahtottas jullata toven todeh: voisgo Karjalan Tazavallas olla kielipeziä, juuri mostu kui saamelazil, vai ei? Sih niškoih diskussieh on kučuttu Karjalan opastusministru, Kanzallizen poliitiekan ministru, Zakonoinhyväksyndykerähmön edustajua, lapsienkazvatuspuolen spetsialistua da meijänpuolistu kieliaktivistua. Pidoh kučutah kanzalaisjärjestölöih kuulujua rahvastu. Pivon vedäjänny roihes Suomalais-ugrilaiset kielet ja kulttuurit varhaiskasvatuksessa -kanzoinvälizen projektan Ven’an puoline koordinuattoru Natalja Antonova.

Karjalan Tazavallas jo on kuda-midä ruattuu kielipezih niškoih jälgivuozin. Vai net ei olla tovellizet kielipezät. Misbo on viga: zakonoin puoles vai meijän valehuos? Voidanehgo kielipezät jalloittua karjalan kielen? Pätähgo kielipezät meijän Karjalah vai niidy suammo vai uneksie? Kel pidäy panna sih vuitti? Moizet kyzymykset roijah sinä illan kielin’okal.

Pido pietäh Karjalan Kanzallizen muzein gubernuattoran zualas 24.02 (tossargen) 16.00-18.00 aigah (Petroskoi, Leninan lagevo, 1). Tulgua terveh!

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat