Vienan Karjala

Kirjutukset vienankarjalakse

Tunnuššuš parahilla perehillä

2. Hmel’ovin-Jelfimovin pereh on yheššä jo 17 vuotta. Vuotena 2005 pereh esitti Koštamušta tašavallan perehkilpailušša ta oli palkittu Kaikista ihmellisin pereh -diplomilla. Marina Jelfimova: ”Enšin liäkärit šanottih, jotta mie en voi šuaha lapšie. Ka šii // Kuva: Ol’ga Smotrova

Talvikuun 22. päivänä Kanšallisešša musejošša myönnettih Karjalan piämiehen Priznanije-palkinto. Jokavuotisella palkinnolla merkitäh tašavallan parahie perehie perehšuhtehien lujittamisešta, tervehen elämän tavoista, lapšien hyväštä kašvatukšešta.
– Omilla korkeilla moralisilla prinsipilöillä työ esitättä esimerkkie koko tašavallalla, korošti juhlaseremonijašša Karjalan piämieš Aleksandr Hudilainen.
Piämieš muissutti, jotta Venäjän presidentti Vladimir Putin omašša Kirjasešša Federalisella kokohukšella pani merkillä yhteiskunnan moralisien peruštehien lujittamisen tärkeyttä.
Tänä vuotena palkittih 18 perehtä Karjalan kakista piirilöistä. Niistä enämmistö on monilapšiset perehet. Kaikista šuurin on Novikin pereh Petroskoista – šiinä kašvau kahekšan lašta. Šamoin monilapšisien perehien luvušša on vielä yhekšän perehtä, niistä Nikutjevin (Kalevala), Hmil’ovin-Jelfimovin (Koštamuš) ta Baranovin (Sortavala) perehissä on nellä lašta, a toisissä perehissä kašvau kolme lašta.
Monta perehtä eläy yheššä jo yli 20 vuotta. Niin, Markovin pereh Segežašta täytti jo 46 vuotta yhteiselämyä, Plotkinin pereh Girvas-pos’olkašta juštih juhli hopeita häitä, Skripničenkon pereh (Louhi) eläy yheššä 23 vuotta, a Tkačukin pereh Belomorskista – yli 20 vuotta.
Kaikki perehet ollah erimoiset ta omaperäset, ka kaikkie yhistäy rakkahuš lapših ta omah šeutuh, tahto kehitykšeh ta aktiivini elämän positijo.
Priznanije-palkinto myönnetäh Karjalašša vuuvvešta 2007 alkuan. Kahekšan vuuvven aikana šen laureattiloiksi tuli 151 karjalaista perehtä. Diplomin lisäkši joka pereh šai 50 tuhatta rupl’ua.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat