Vienan Karjala

Kirjutukset vienankarjalakse

Karjalan pohjosešša

Sateenkaari-folklorikollektiivin ošallistujat Zinaida Ust’ugova ta Raisa Kundoz’orova

Niin himottais, jotta nämä ”veräjät” avauvuttais rikenempäh, ka šitä varoin pitäy tutkie ta šäilyttyä kaikkie, millä meijän kantatuatot elettih.

Sohjanankošen kyläššä jo monta vuotta on toimin loistava Sateenkaari-folklorikollektiivi. Še oli peruššettu vuotena 2000, ka duetin ošallistujien Zinaida Ust’ugovan ta Raisa Kundoz’orovan luomistyö alko vielä kouluvuosina.

Naiset ollah šyntyperäset karjalaiset. Heijän lapšuš ta nuoret vuuvvet mäntih Louhen piirin Nisan kyläššä.

Zinaida Jevlampijevnan ta Raisa Ionovnan ohjelmistošša on ylen äijän lauluja. Hyö lauletah lauluja karjalan, šuomen ta venäjän kielillä. Sohjanankošen kulttuuritalošša ei ole musiikkiohjuajua, šentäh naiset lauletah ilmain šäješšyštä.

Zinaida Ust’ugova on kerännyn paikalliseläjiltä ta oppin lukusie karjalaisie lauluja, šamoin hiän oppiu ta esittäy Kalevala-eepossan runoja. Yheššä Kulttuuritalon taitehjohtajan kera Zinaida Jevlampijevna pitäy harjotteluja lapšien Lintuset-folklorikollektivin ošallistujilla, kiäntäy karjalakši starinoja, lauluja, leikkijä. Raisa Kundoz’orova ompelou kanšallisie pukuja Kulttuuritalon luomiskollektiivien artistoilla.

Sateenkaari-duetti ošallistuu piirin ta tašavallan monih festivaliloih, konserttiloih, pruasniekkoih, eri toimehpitoloih, kumpaset on šivottu kanšallisen kulttuurin kera. Zinaida ta Raisa otetah vaštah turistija, kumpaset käyväh Sohjanankošen kyläh ta esitetäh heilä omie neroja.

Zinaida Ust’ugova ta Raisa Kundoz’orova oikein tykätäh omua karjalan kieltä ta staraijah luovuttua omie tietoja nuorella polvella – omilla punukoilla. Naiset ollah Kulttuuritalon korvuamattomah apulaiset. Hyö ollah hyvin tunnolliset ta vaštuuliset ruatajat.

Sateenkaari-duetilla on myönnetty Rahvahallini omatoimini luomiskollektiivi -arvonimi. Folklorikollektiivilla on monta tašavallan ta piirin kiitoškirjaista, kunnivokirjua, diplomie aktiivisešta ošallistumisešta N’apašeuvun alovehen yhteiskunnalliseh elämäh, šekä karjalaisen kulttuurin šäilyttämiseštä ta šuurešta panokšešta šiih.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat