Lapset, nuorižo, perehet, internet – Karjalan Rahvahan Liiton eduoigevuot

Karjalan Rahvahan Liiton kahteskymmenes seiččemes vuoronmugaine vuozikerähmö piettih mennyön pyhänpiän Petroskoil jo tavan mugah Elias Lönnrotan nimizes suomelas-ugrilazes školan seinis. Suuremban karjalazien yhteiskunnallizen organizatsien vuozipido meni rauhuon-tervehyön luaduh. Uudizennu oli Vieljärven kylän teatrujoukon ezitys ”Douhtorilluo”, kirjuttajan Paavo Harakan kerdomuksen pohjale luajittu.

Rahvas aktiviziiruittihes enämbäl

Kerähmöl ei olluh äijii alaozastoloin rahvahii, ga školan suuri zualu oli lähes täyzi paikallistu linnalastu. Hyvin mustan sentämän enne olijoi kerähmölöi, konzu odva kerävyi puoli zualua ristitytty. Nygöi rahvas ruvettih rakkahembal käymäh kielikursiloile dai vuozikerähmölöile. Enne kerähmyö sai ostua kniigua, suveniirua, maksua jen’guavustuken liiton hyväkse, suaha käzih pajatettavakse gimnan karjalankielizet sanat da liiton halličuksen pitkät ruadopluanat vuvvekse edehpäi.

Halličuksen piälikkö Natto Varpuni raportoičči vienakse halličukseh  kuulujien seiččemen hengen ruavos “šuun puhtahakši”. Pagin ennepäi oli jullattu Oma Mua -lehtes. Liitto syvendyy konkriettizih kieldy da kul’tuurua kannattajih projektoih, enimät kudamis ollah perehih, nuorižoh da lapsih niškoi libo internetas libujat. Paginanvedäjän sanoin mugah, Liitto puaksuh kiändyy valdivoelimien puoleh dai kaččomattah kaikenmoizih vaigevuksih aziet suahah sellitettylöikse. ”Herrat Karjalah tullah ta männäh, a myö jiämmä tänne...”, ližäili Natto. 

Stuatusassah pajo on vie pitky

Vikkelembii kyzymyksii paginoin keskes on olluh karjalan valdivollizen stuatusan suamizekse azutun ruadojoukon kuulumizet. Liiton halličustu  huolestuttau se, ku juokon ruandas ei ole nimidä virrallistu tieduo eigo lehtistös, eigo suusanal, a rahvas kyzelläh sih nähte. Ruadojoukon vahnin Tatjana Klejerova sellitti šeikkuperäzesti, ku täkse aigua yhtes Kanzallizen poliitiekan ministerstvanke on luajittu tiekartu, kudaman vuoh opitah puuttuo perile, kudamas puoles olis parembi tartuo täh vaigieh kyzymykseh. ”Ei meidy Karjalan parluamentah äijäl vuoteta, pidäy ylen hyvin ruadua deputuatoinke”, vakusteli Tatjana Sem’onovna...