Vienan Karjala

Kirjutukset vienankarjalakse

“Lokka” lenti enšimmäisellä paikalla

Kuvašša Lokka-tanššikollektiivi valmistautuu esiintymiseh Kemissä. // Kuva: Antti Tuomi

Alovehellini rahvahan horeografijan kilpailu oli järješšetty V Kanšainvälisen Viola Malmilla nimetyn šuomelais-ugrilaisien rahvahien Karg kučub -horeografijafestivalin merkeissä.

Kilpailuh ošallistu yli 15 omatoimista kollektiivie Kemistä, Segežašta, Belomorskista, Louhešta, Kalevalašta, Koštamukšešta, Rukajärveštä, Mujejärveštä, Čupašta. Kilpailun tanššiohjelma oli pohatta, kaččojat ta arvoštelijat šuatih nähä 44 esityštä.

Tašavallan pohjoisošan parahien tanššikollektiivien innokašša kilpailušša voitti Kalevalan kulttuuritalon Lokka-yhtyveh. Tanššikollektiivin ohjuajana on Laina Zinnurova. Kilpailuo varoin ohjuaja tanššijien kera valmisti uuvven Ilokerä – kalevalalaiset tanššileikit -ohjelman.

“Lokan” kahekšanminuuttini esityš vallotti kuin kaččojien, niin ni arvoštelijien šyväimet. Šen tulokšena on arvoššettu palkinto: enšimmäisen aštien diplomi ta kučču tašavallan kilpailuh, kumpani pietäh kešäkuušša Petroskoissa.

Toisella paikalla piäsi meijän pohjoisnuapuri – Louhen kulttuuritalon Ivan da Marja -folklorikollektiivi. Šen ohjelmašša niise oltih kalevalalaiset ta louhelaiset rahvahan tanššit. Arvoštelijat annettih kolmannen paikan Pomorien venäläisellä rahvahan kuorolla, kumpasen ohjelmašša oltih pomorilaiset tanššit.

Onnittelemma kaikkie, ken valmisti Lokan artistoja kilpailudeb’uttih šekä tanššijie, kumpaset niin hyvin esitettih meijän piirie Kemin lavalla. Hyväh lykkyh, “Lokka”!

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat