Vienan Karjala

Kirjutukset vienankarjalakse

Seiččemel mäil, kahteltostu järvel

Veškelyksen kylän kuva Kennikkymäin časounan levolpäi. // Kuva: Jelena Ruppijeva

Veškelys on suan kilometrin piäs Petroskoispäi Suojärveh päi. Kylä on sijoitunnuhes ylen čomal kohtal: tiä on 12 järvie da seiččei suurdu mägie. Sendäh kodirannan tiedäi, paikallizen kirjaston ruadai L’ubov’ Prisoškova verduau Veškelysty Moskovah: Veškelys, ku Moskovugi, seizou seiččemel mäil. Veškelykseh kuuluu äijy piendy kylästy – Makkoila, Hoškoila, Padagju, Vaččoila, Pedri, Pappila.

Karjalazet tuldih nämile mualoile vikse jo toizen vuozituhanden algupuolel. Enzimästy kerdua Veškelysty mainittih vuvvennu 1582 Oniegantagazien pogostoin verokniigois. Sie luvemmo, ku Anuksen pogostas on ”Salmen kylä Veškelyksen mäil”. Kylä silloi oli aiga suuri: seiččei taloidu da vie kaksitostu taloin sijua. Samazes kniigas mainittih vie toinegi kylä Veškelyksen mäil. Sie elettih kolmes talois da oli nelli tyhjiä taloin sijua, ku tiä, kuigi enzimäzes kyläs, koit poltettih da eläjii tapettih nemetskoit rahvas. Kusbo sit voidus olla enzimäzet Veškelyksen kylät da mindäh Veškelys ollou Veškelys? L’ubov’ Prisoškova vastai nenga:

– Se on Hoškoila. Kniigois kirjutettu kylä 100 kilometrin piäs Petroskoispäi on Hoškoila. Yksis kniigois on kirjutettu Hoškoila, toizis – Goškoila. Sit se on enzimäine kylä. A sit jo zavodittihes toizet kylät. Kaikenmostu on, kui sanotah, versiedy, imenno karjalaine on vezikylä. Vetty on äijy. Rinnal on meččykylä, Meččelys. A meil on vezikylä. Moine on versii. Sanottih, sie veškat pandih, Veškelitsa. Vie sanotah, i litsa l’udei, ket eletäh. Se ei ole muga. Minä en muga duumaiče...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat