Vienan Karjala

Kirjutukset vienankarjalakse

Vuuvven paraš kirja – 2015

Periodika-kuštantamon kakši kirjua voitti kilpailušša. Kuvašša kuštantamon ruatajat Alina Čuburova (vaš.) ta L’udmila Talja. // Kuva: Galina Baburova

Kaikkieštah XVI Vuuvven parahan kirja -kilpailuh ošallistu 16 kuštantamuo ta yli 50 julkaisjärještyö, kumpaset vuotena 2015 esitettih Karjalan Kirjakamarih 734 kirjua ta painotevošta. Kaikkieštah viime vuotena Karjalašša painettih 290 tuhatta kappalehta kauno- ta tietokirjoja, karttoja ta tietoruatoja.

Järještäjäkomitiettah kuulu Kulttuuri-, Opaššuš-, Kanšallisušpolitiikan ministerijöt, Kanšallini kirjašto, Petroskoin halličuš ta Karjalan yhteiskunnallini Kirjojen harraštajien šeura -järještö. Kaikki kilpailun kirjat oltih hyvät, ka arvoštelijien piti valita hyvistä parahat.

Juhlaseremonijašša taitelija Irina Stafejeva mualasi joka voittajan kirjan kuvie. Kaččojien piti arvata, mimmoni kirja voittau joka nominatijošša.

Paraš kirja karjalan, šuomen ta vepsän kielellä -nominatijošša kilpaili kolme kirjua: “Matkustan ympäri Suomen maan”, “Vienan karjalan oppikirja” ta “Kuldaižet sanad.” Täššä nominatijošša voitti Nikolai Abramovin ta Nina Zaicevan Kuldaižet sanad -runokokoelma. Tämä kokoelma on viimeni kirja Karjalan kirjallisuuden klassikot -šarjašša. Kunnivokirjan šai Abramovin plem’anniekka Dmitri Fedotov.

Parahakši oppikirjakši tuli Ernest Ivanterin Teriologija-kirja, Parahakši kirjakši lapšilla ta nuorisolla oli valittu Periodika-kuštantamošša painettu Jelena Harlamovan Taivahalta tipahteli skokunoja -kirja, a Nadežda Vasiljevan kirjattama Čaša sija -kirja tuli Parahakši kaunokirjallisuon kirjakši.

Paraš kirjan taito- ta kirjapainokorissuš -nominatijon voittajakši tuli Karjalan akvarelli -kirja. Tämä kirja oli painettu Skandinavia-kuštantamošša ta še tuli Karjalan parahakši vuuvven 2015 kirjakši.

Lukijien mieltymyšpalkinto oli annettu Verso-kuštantamon Sortavala. L’ubov’ k sportu -kirjalla. Nominatijon voittaja šai šuuren tortin.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat