Vienan Karjala

Kirjutukset vienankarjalakse

“Tarinan” šuuri mäneššyš

Tarina-folkloristudijo vierailumatalla Kuhmošša ohjuajan Arina Sem’onovan (oik.) kera. // Kuva: Kuva otettu A. Sem’onovan arhiivašta

Tarina-folkloristudijo ošallistuu kaikkih kulttuuritapahtumih ta konšerttiloih. Yhtyvehen ohjelmašša on kanšallisie lauluja ta tanššija, rahvahan ta karjalaisien šäveltäjien musiikkitevokšie.

Viisikielini kannel on ”Tarinan” piäatribuuttina, työkaluna ta nimikorttina. Kantelen šoittau hellyttäy joka karjalaisen šieluo. Konša kollektiivi šoittau ta laulau, šali hillenöy. Kantelen ta lapšien puhtahat, melodiset ta vienot iänet ollah ”Tarinan” šoinnun šalana. Yhtyvehen musiikki myöššyttäy meijät karjalaisen musiikkikulttuurin alkuh, Kalevalan runošeuvun pohjah. Tarina-folkloristudijon musiikki on lyyrini, šuruni ta näyttäy hyvin puhtahalta ta haprakalta. Joka kerta še koškou henken joušija, antau ymmärttyä, kuin kummallini ta pohatta on musiikkikieli.

Arina Sem’onova on Tarina-yhtyvehen peruštaja ta ohjuau šitä jo monta vuotta. Arina on erittäin ammattitaitoni journalisti, nerokaš musiikko ta karjalaisen kanšallisen kulttuurin aktivisti. Oman perušruavon ta folklorikollektiivin ohjuamisen lisäkši Arina opaštuu ulkuota Petroskoin konservatorijašša ta tanššiu horeografisešša Lokka-kollektiivissa.

Šulakuun viimesinä päivinä Kalevalah lenti hyvä viesti: Venäjän laulu-eepossan esiintäjien kilpailun mukah Venäjän eeppisen kulttuurin Starina-forumin puittehissa Tarina-folkloristudijo on palkittu III aštehen diplomilla. Še on kalevalalaisien lapšien ta heijän ohjuajan šuuri mäneššyš. Bravo!

Kalevalan Kulttuuritalon konšertissa, kumpani piettih 2. oraškuuta, Tarina-kollektiivi esitti kaččojilla uuvven luomistyön – Kiestinkin katrillin. Lapšet enšimmäistä kertua tanššittih šitä lavalla. ”Tarinan” luomiskuvah hyvin paššatah karjalaiset tanššit, kumpasien luvušša on ni tunnettu Humahuš-tanšši. Ne autetah kaččojua tuntie karjalaista pohattua kulttuurie.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat