Vienan Karjala

Kirjutukset vienankarjalakse

“Seiččei tiähtie” Vieljärves

Seiččei tiähtie -spektaklin artistat (hurualpäi oigiele): Ol’ga Vasiljeva, Tatjana Nikitina, L’udmila Orava, Nadežda Ignatenkova, Nadežda Jegorova, Nadežda Zaitseva, Galina Kuz’mina. // Kuva: Kirill Ognev

Sen kirjutti ven’akse Smolenskan alovehel eläi Nina Sem’onova, karjalakse kiändi Vieljärven teatrujoukon ohjuaju Vera Ivanova. Tämä ozutus on luajittu Voitonpäiväkse, ga juuri 9. päiviä tädä kuudu sidä ei ehtitty valmistua, ga yhtelläh enziozutus ei myöhästynnyh, kogo kuuhäi on Voiton kuu. Kaččomah uuttu karjalankielisty spektaklii kerdyi täyzi perti rahvastu.

– Minä piädykauti valličin tämän ozutelman, ku jogahistu meis koskou Suuri Ižänmualline voinu da Voitonpäivy meijän muas on suurin pruazniekku. Hos myö emmo iče olluh voinal, ga voinan gor’at da tuskat pidi tirpua meijän tuattoloil, muamoloil, died’oloil, buaboloil. Smolenskan alovehel on ylen äijy velleskalmua. Sigäläzel rahvahal pidi tirpua äijän gor’ua. Ozutelman kirjuttai sanoi, ku häi kirjutti oman tevoksen tozitapahtumien pohjale. Voinu tännesäh ei jätä meidy. Oraskuun 8. päivänny minun bunukku löydi mečäs kaksi voinanaigastu granuattua, kuduat tännesäh viruttih räjähtämättäh, saneli teatran ohjuaju Vera Dmitrijevna Ivanova enne ozutuksen algamistu.

Erähäs kyläs horan ohjuaju As’aine (Ol’ga Vasiljeva) valmistau kylän akkoi (L’udmila Orava, Nadežda Ignatenkova, Nadežda Zaitseva, Tatjana Nikitina, Galina Kuz’mina) pajofestivualih. Yhtelläh pajo nikui ei lähte, hos opitah hol’ahuttua yhty, tostu da erästy. Pajattamizes tolkuu ei tule, ku harjoitukseh ei tulluh paras pajattai Arhipouna (Nadežda Jegorova).

Horan ohjuaju As’aine juoksou kuččumah Arhipounua repetitsieh. Ga pertih nostuu huaristuu: emändy panou stolale seiččei juodastu, jagau seiččei luzikkua, valau joga juodazeh rokkua da rubieu gostittamah omii poigii. Pagizou jogahizenke, Pet’a-poigua vie luzikal oččah pločkuau: älä vellie tuskevuta! Stolas ei ole nikedä... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat