Vienan Karjala

Kirjutukset vienankarjalakse

Kieldy nuorile – opastettavakse da paistavakse

”Oman Muan” toimittajat kehoitettih lapsile uuttu stolakižua: kartan mugah pidäy piästä Karjalan suvipuoles pohjazeh, ga matkates vie pidäy täyttiä käskiettyy.

Tänä vuon luagerih tuli 25 nuordu Karjalan eri puolilpäi – karjalastu, vepsälästy da suomelastu. Karjalazien joukko oli kaikis suurin – 15 hengie: seiččie liygilästy da kaheksa vienalastu.

Tyttölöil da brihaččuloil oli mahto kävvä Kinnermän kyläh da Vieljärven Karjalan Kielen Kodih. Kanzallizien liittoloin rahvas saneltih heile omassah projektois. Nuorii taluttih Kanzallizeh kirjastoh. GTRK ”Karelian” ruadajat ylbeillen ozutettih heile nygyaigazii ruadolaittehii. Periodika-julguamon toimittajat saneltih, kui luajitah lehtii da žurnualoi. Rahvahallizien ruutien ombelii Margarita Kemppainen pidi master-kluasat, saneli XII vuozisuan ruutis da XIX vuozisuan naizien ferezilöis da miehien sovis. Paikannimistön tutkii Irma Mullonen saneli tundiettulois da tundemattomis paikannimilöis. Illaksegi lapsile ainos oli valmistettu midägi mieleh painujua. Erähänny piän hyö kižattih sportukižoi, tossu piän vastavuttih Toive-ansamblin nuorien pajattajien da tansijoin kel.

Ku luagerin piäaihe on kielet – karjalan, suomen da vepsän – oli lapsil kieliurokkoigi, kudamil lapset kižattih, arvattih sanaristikkölöi, pandih mustoh karjalankielizii sanoi, opittih paista karjalakse da pajatettih.

– Tänä vuon sanozin, ku lapsil on huonombi kielimalto, ku verratahäi sidä mulloi luageris olluzien kielineroh, paheksiu Svetalana Rudakova. – Enimät lapset kieldy ei malteta vouse. On erästy, ket ellendetäh karjalakse, ga paista ei. Kyzelin heil, tahtottasgo hyö školan loppiettuu tulla opastumah karjalan kielen ozastole, ga onnuako kaikin lähtiettäs rakkahembal toizih kohtih opastumah.

Sidä ei ni pie kummeksie, ku myö jo äijän kerdua sanoimmo: nuoret da heijän vahnembat ei nähtä perspektiivua karjalan kieles, heijän mieles se eläjes ei päi nikunne...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat