Vienan Karjala

Kirjutukset vienankarjalakse

Kalittua ta huvija eri makuh

Mahtava kalitta oli šyöty, vačat täpötäyvekši. // Kuva: Sergei Tiškovski

Festivalin järještäjänä on Piipun piha -lomakeškuš. Šen johtajan Aleksandr Artemjevin mukah, festivalin ideja on noštua ta pityä arvošša karjalaista kulttuurie ta karjalaisie perintehie. Kuin näkyy festivalin nimeštäki, šen piäšankarina on kalitta. Tänä vuotena Piipun pihalla oli paissettu ta šyöty enämmän 5000 kalittua!

Festivalin kynnykšellä järještäjät kyšyttih rahvahalta internetissä, mimmosie kalittoja hyö šyötäis mielummin. Noin 65 % kyšelyn ošanottajista šyötäis mielummin potakkakalittoja. 18% valittih kalittoja prossan kera, 10 % šyötäis kalittoja riissun kera, 7% valittih vastaukšen ”oma variantti”.

Moskovašta kučuttu artisti ta keittäjämuasteri Felix Šul’tess piti kalitta-šoun, min aikana opašti rahvašta paistamah kalittoja ta šiitä valičči parahie kalitan muasterija. Voittajat šuatih lahjakši pualikkoja ta lautoja keittäjämuasterin allakirjutukšen kera.

Tavan mukah pruasniekkarahvahan ilokši oli paissettu šuuri kalitta. Še oli noin metrin levie ta kahen metrin pituvuini.

Karjalanpiirakkafestivalin huvija oli eri makuh. Lomakeškukšen pihalla ruato erilaisie työpajoja. Tiäläki oli järješšetty muistoesinehien jarmankka. Karjala-folkloriryhmän kera yheššä pruasniekkarahvaš leikki piirileikkijä ta tanšši karjalaisie tanššija. Lavalla šoitti piiteriläini harmonikan šoittaja Ivan Razumov. Värtsilän kuklateatteri lahjotti iluo lapšilla.

Festivalin rajoissa oli niise järješšetty kyykkä-kilpailut, mit piettih Karjalan Rahvahan Liton kyykkärit. Kilpailuih otti ošua viisi paikallista joukkovehta. Voittajakši tuli Riekkalansaaren ošakunnan joukkoveh.

Järještäjien mukah, Kalitan pruasniekkah otti ošua noin tuhat ristikanšua Karjalašta, Venäjälta ta Šuomeštaki. Tulijana vuotena kaikkie tuaš kučutah Luatokan rannalla kalittoja šyömäh!

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat