Vienan Karjala

Kirjutukset vienankarjalakse

Lahteh kerävyi suomelas-ugrilastu ymbäri muailmua

Vienalaine Tatjana Klejerova (hurual) tuli komilazen Valerii Markovan sijah. Tuliet nelli vuottu suomelas-ugrilazien yhtehizes ruavos piälimäzenny rodieu karjalaine naine. // Kuva: Natalja Iškina, “Oma Mua”

Muailman kongressoih, kudamii pietäh kerran nelläs vuvves, kerävyy suomelas-ugrilastu ymbäri muailmua. Tämän vuvven suureh pidoh tuli enämbi 600 meijän  heimovellie – suomelastu, eestilästy, vengrua, saamelastu, kvenua, setuu, liivua, vepsälästy, inkerilästy, inkeroistu, komilastu, komi-perm’akkua, nensua, hantua, vatjalastu, mansilastu, nganasanua, entsua, sel’kupua, udmurtua, erz’alastu, mokšalastu da marilastu. Niilöin joukos oli 174 deleguattua, enämbi 370 tarkastajua da 50 lehtimiesty.

Lahten kongressu algavui saamelazen räp-pajattajan Ailu Vallen ezitykses. Sit nuoret suomelazet Lahten tansiopistospäi oravazien da puuloin ruutis ozutettih omua tansineruo.

Kongresan avai Suomen prezidentu Sauli Niinistö, kuduan kannatuksel se oligi pietty. Häi vihjai suomelas-ugrilazien kielien säilyttämizen tärgevyön da kiitti ielolijoin kielimiehien da tutkijoin polvie heijän suures ruavos sen hyväkse.

Tervehtimäs suureh pidoh tulluzii suomelas-ugrilazii oldih Vengrien prezidentu Janoš Ader da Eestin prezidentu Toomas Henrik Ilves. Vengrien prezidentu sanoi, ku pieniluguzien suomelas-ugrilazien kanzoin joukos vengrat ollah suurin kanzu, hyö tundietah omua vastuolližuttu heimovellien ies, ku “heijän lugu ainos vai pienenöy”. Eestilästy prezidentua huolestuttau suomelas-ugrilazien tulii oza da hänen pagin oli ies mainittulois kaikis jylgevin.

Ven’an prezidentan Vladimir Putinan tervehtyssanat kongressalazile lugi Aleksandr Žuravskii, Ven’an kul’tuuran ministran sijahine. Žuravskii ei andanuh peräh Eestin prezidentale. Omas pitkäs paginas häi luvetteli “konkreetiizet projektat, kudamii todevutettih nellän vuvven aigah” kongresoin välis. Erähänny ezimerkinny hänen paginas oli “ei kaikis suurimas da ei kaikis bohattavimas Mari-Elan tazavallas avattu škola lahjakkahih lapsih niškoi, nostettu uuzi ooperan da balietan teatru, tyttiteatru...” 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat