Vienan Karjala

Kirjutukset vienankarjalakse

Tahtozin piästä piän loittozeh magieh uneh

Karelication -livvinkarjalazen räppi-al’boman alguhpanija Natalja Antonova. // Kuva: Kuva N. Antonovan arhiivas

Räppi on ihan uuzi da veres muuzikan luadu karjalan rahvahan nygyagjallizes kul’tuuras. Päivän valgien ezmäzele diskale andoi Nuori Karjala -organizatsii. Tänä keviän ilmah piästettyy al’bomua suau kuulta jo internetasgi http://vk.com/karjalanrappi -kohtas. Kui tuli mieleh luadie karjalaine räppi da kui jalloitui karjalankieline räppäri, lugiettavakse täs.

– Livgiläine räppi -idei on pyörinyh piäs jo vuozinnu 2008-2010, konzu ruavoin Petroskoin kul’tuuruopistos artistoin ozastol livvinkarjalan opastajannu. Opastumas minulluo silloi oli kuuzi hengie, kai oldih karjalazis kohtispäi tulluot. Niidy nuorii pidi varustua ruadoh Kanzallizeh teatrah. Puolet siegi nygöi ruatah: anukselazet L’udmila Isakova da Andrei Gorškov, dessoilču Anni Kondrakova. Dostaliloin pluanat keskustuttih. Mustan, ainavo livvii pagizii silloi oli anukselaine briha Andrei Gorškov, muut libo ei maltetu vouse, libo pikoi vähäzel da vai erähii sanoi. Ei ni tottu sanojes Andrei ihan tävvel suul paissuh, no ellendi minun paginan hyvin da maltoi yksinkerdazeh luaduh vastata. Ihastuin äijäl: hyvinhäi tiijän, ku meijän aijal kaheksatostuvuodehine karjalua maltai on jo harvinažus. Huomain, ku iändämys brihal on oma, tozi karjalaine. Täs la tolkuu rodieu, abrikuičin.

Silloi Andrei mainiči, ku räpättäy ven’akse Mul’tiparadigmat-joukkolazienke Petroskoin yökluubois. Minä silloi nimilleh sih en olluh, ga vastebo vuvvennu 2010 se dielo juohtui piäh, konzu kävähtimmös Suomeh saamelazeh kyläh Inarih da sain kuulta Amoc-inarinsaamelazen räppärin. Minulleni saneltih milleh räppi vaikutti paikallizeh nuorižoh da kui hyö sen kauti kiännyttih unohtettuh kieleh. Mustan, kui Inaris olles yölöil en voinnuh muata. Tilas olles kymmenii dai onnuako sadoi kerdoi kačoin YouTubespäi yhty da samua räp-kappalehtu, Amocin, kudaman oma nimi on Mikkâl Antti Morottaja. Ihastelimmos, mittuine čoma dai, ruohtizin sanuo, seksualine on inarinsaame räpinny dai samal jo kuvittelin liygii. Piä rouno šemavui, mustan, kai piänahkua rubei kupettamah. Livvinkarjalaine räppi meni piäh syväl...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat