Vienan Karjala

Kirjutukset vienankarjalakse

Nouze, lembi, nostajes, liiku, lembi, liikutes

Täl kerdua pruazniekan piettih “Oman Muan” ruadajat Natalja Sinitskaja da Margarita Kemppainen. // Kuva: Natalja Iškina

Jo toizen kerran Karjalan Kielen Kois Vieljärves piettih Viändöin pruazniekkua, juohateltih Iivanan da Pedrunpäivän välizen aijan ennevahnallizii perindölöi, tiedovoittih da nostettih lembie. Kai menot oldih karjalan kielel. Viändöidy Karjalan Kielen Kois piettih Oma Mua -lehten ruadajat Natalja Sinitskaja da Rita Kemppainen.

Jogahizele Viändöin pruazniekkah tulijale kädeh sivottih ruskei villaine langu. Luajittih kolme solmie, kudamien sivotes hänel pidi toivottua midätahto hyviä, sit astuo lehtiveriän kauti da koskettua ylähän rippujua kellostu, ku täytyttäs kai toivomukset. 

– Kuibo karjalazet sanotah sidä aiguvälii Iivananpäivän da Pedrunpäivän välis? kyzyi allus Natalja Sinitskaja. – Viändöikse sanotah.

Hyvä. I se Viändöinaigu karjalazet maltetah oman ičen hyväkse pidiä da tiedovoija. Tiijättögo, mi on lembi? Voibigo sidä oppie, n’uustua, käis pidiä, piäl panna?

Mi on lembi, maltoi vastata vai 84-vuodehine Ivanovan Anni:

– Lembi se on, tiettäväine, lembie nostatetah štobi brihat enämbäl kačottas neidizih. Vot se on lembi. Sit lembie ken maltau, se nostatetah, a minä en maltanuh, ga yksikai aigu meni. Dai pruazniekois brihua kodih suattajua äijy oli...

Viändöin aigua päiväine kiändyy talvehpäi, kezä räkkehpäi, kai luondo on parahimuolleh, puulois, heinis da kukis on enin vägie. Tämän periä aigu heinykuun seiččemenden da kahtendentostu päivän välil on paras aigu kuvata vastoi da nostua lembie...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat