Viändöin pruazniekku Jyrgiläs

Suovattan, 9. heinykuudu, Vieljärven Jyrgiläs enzimästy kerdua täl vuozisual piettih onnuako kaikis čomin kezäpruazniekku — Viändöi. Vähilleh kai kylä, ruavahat dai lapset, kerävyttih järvirandah Muuhorovan pihah, kus oli jo viritetty tuli. Vähä ken tiezi, mi se on viändöi da lembi, da mikse sidä pidäy nostua. Ga oma kyläläine Rodin Natoi maltoi kai hyväh luaduh sanelta da nevvuo da nosti kaikile tulluzile naizile da miehile lembie. Naizii da neidizii kylvetti pehmiel koivuvastal, a brihoi da miehii — čökittäjäl kuuzizel.

Kel on lembi suurembi da korgiembi, opittih arvata kižas, kus naine da mies seizotah sellin toine toizeh haravu jalloin välis. Miehel pidäy tavata haravan varren n’okal kengy, naizel pidäs kaikelleh vastustua tädä. Yhtelläh Myhäzen Tan’a ei voinnuh sidä ruadua da jälgimäi Makoin Kol’a sai harvahan vardeh kengän. Viändöin pruazniekas kaikin vie hypittih tules piäliči, ku kai tavvit da prizorat pakuttas.