Karjalan kielen kodi Vieljärvel sai blahosloven’n’an Il’l’an päiviä vaste

Vezihändy da vezi-ižändy  parrakas Pyhä Il’l’u pyhäillän jyryl da korvois kuadajal vihmal andoi tiediä oman ičen tulendas Vieljärven kyläh. Onhäi se kyläle oma pruazniekku. Kaksoiskallehuon sai se täl kerral mindäh sendäh Vieljärven tapoksile käi Kogo Suomen pravoslavnoin kirikön arhijepiiskoppu Leo, kudai on Suomen puolen Karjalan Kielen Seuran ammuine paginanvedäi. Arhijepiiskoppu čökkelih Vieljärven kirikköh, Kinnermäin da Jyrgilän časounoih, blahoslovi Karjalan kielen koin ruandua. Blahosloven’n’an pidi karjalan kielel toivottajen pitkiä igiä – pitkiä ozua rajan mollembil puolil eläjile karjalazile.

Karjalan kielen kodi pidi mennyt pyhänpiän oman nelländen roindupiän. Karjalankielizen pihaprogramman pidi Natalja Antonova. Käymäh pidoh oli enämbi sadua gost’ua Suomespäi -  Anuksen muuzikkufestivualin ozanottajua. Se festivuali piettih 30.7 – 2.8 välil Anuksen da Priäžän rajonois jo kuvvettu kerdua. Soitettih lujah soittuo, pajatetteh karjalankielizii pajoloi. Karjalan kielen koin ruandua kuuluu loitokse mieroh.