Vienan Karjala

Kirjutukset vienankarjalakse

Mi vuosi nyt on, tahi pokemonit myöššytäh

2. Matkuštuas’s’a peluaja voit tavata pokemonin, kumpasen hiän näköy mopikan ruuvulta ta kaikki še tapahtuu niin kuin tovellisešša muajilmašša. // Kuva: Anna Deš

”Pokemon Go” on uuši mopikkapeli, kumpani kekšittih Yhyšvalloissa. Nyt še peli hyvin ruttoh leviey pitin muajilmua. Meijän kaupunki niise ei jiänyn šivuh.

Pokemon (enklannin kieleštä Pocket Monster ili taškumonsteri) on kekšitty hahmo. Še on šemmoni epätavallini elukka, kumpasella on superkykyjä. Nyt on olomašša pokemonin 721 lajie. Monet ihmiset muissetah pokemonija, šentäh kun ennein, 2000-luvulla, melkein jokahini lapši kaččo tätä tunnettuo japanilaista piirrošfilmie. Voit olla, jotta šentäh šitä pelie peluauki niin äijän ihmistä: še on šemmoni nostalgija.

Pelin šiännöt ollah helpot: pitäy eččie ta šuaha kiini pokemonija. Voit äšen kehittyä yhtä pokemonie, jotta še piäsis voittajakši taistelušša toisien pokemonien kera – kaikki on luajittu niin, kuin oli pirrošfilmissä.

Šillä aikua, kuni peluaja šiirtyy tovellišešša elämäššä, hänen avatar-kuva matkuštau kartalla GPS-ohjelman avulla. Niin matkuštuas’s’a šie voit tavata pokemonin, kumpasen niät mopikan ruuvulta ta kaikki še tapahtuu niin kuin tovellisešša muajilmašša. Erikoini kartta auttau eččie pokemonija, kumpaset voijah ilmeštyö vaikka missä päikašša: kavulla, portahikošša, joven tahi järven rannalla, koissa, kahvilašša ta niin ielläh.

Pokemon Go -peli šytytti šuurie kiistoja. Monet šanotah, jotta še on vielä yksi kekšitty tyhmyš. Toišet kirotah pelie, hyö ollah varmat, jotta še on vuarallini ta ehotetah šitä kieltyä.

Onnakko pelillä on hyvin äijän puoluštajie ta peluajie. Monet ihmišet šanotah, jotta ”Pokemon Go” on hyvä šyy männä kavulla ta vähäsen voimissella: anna lapšet, kumpaset koko päivät issutah tietokonehen ieššä, parempi kävelläh verekšeššä ilmašša.

Sosialiverkoštoissa on ilmeštyn erilaisie joukkoja, missä karjalaiset pokemonien pyytäjät aktiivisešti kerrotah toini toisella omista mäneššykšistä ta annetah neuvoja.

On vaikie šanuo varmašti, onko tämä peli paha tahi hyvä, vuarallini tahi hyövyllini. Šamoin vaikieta on einuštua, pitältikö keštäy pokemonomanija ta äijänkö vielä aikuhisie ta lapšie še muanittau omih rivilöih.

 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat