Vienan Karjala

Kirjutukset vienankarjalakse

«Pitky on moine dorogu, kudamal ei ole kiänälmysty.»

Verhovnoin suvvon taloi Vašingtonas.

Matkua enne

Vie tuhukuus minä en kerävynnyh nikunne, ga sulakuus jo olin Moskovas Amerikan posol’stvan pordahil. Open World (karjalakse - Avvoi Muailmu) -progruamman vuoh nelli suomi-ugrilazien da turkilazien joukkuo kogo Ven’alpäi lähti pitkäh matkah Amerikan eri linnoih. Meijän joukos oli kuuzi hengie: Periodika-julguamon ruadajat vepsäläine Marija Košeleva, karjalazet Natalja Kibrojeva, Alina Čuburova da Sergei Minvalejev, Karjalan kanzalliskielizen raadivoin toimituksen ruadai vepsäläine Larisa Smolina da Pskovan alovehen seto-rahvahan muzein ruadai Jelena Variksoo. Meijän joukon piälikönny, abuniekannu da kiändäjänny oli Voronežas eläi Natalja Bairak, kudai kogo matkan aigah avvutti meile da kiändi meijän paginoi. Natalja ylen hyvin maltau anglien kieldy, häi yhten vuvven opastui Amerikas.

Programmas oli kaksi amerikkalastu linnua: piälinnu Vašington, kudamas myö kaksi päiviä elimmö parembazis hotellipertilöis da Memfis-linnu, kudamas kaheksa päiviä elimmö amerikkalazis perehis. Enne Amerikkah lähtendiä meile kerrottih, mittuzet vehkehet pidäy ottua keräle, a mittuzii ei pie. Sanottih, ku tapkoi ei pie ottua, ku kois la amerikkalazet kävelläh pihakengis, vihmansuojusgi ei päi matkah.  Ga elämäh myö puutuimmo moizeh kodih, kus kaikin kävelläh vaiku kodijallaččilois da vihmui läs kogo matkan aigua.

Vašingtonan lendoazemal

Vašingtonah tulduu lendoazemal sain oman čamodanan, ga se oli  murennuh. Hyvä, ku meile vie Moskovas kerrottih, midä voibi roita aeroportas. Minä sanoin omas hiäs Nataljale, da myö yhtes lähtimmö ozuttamah minun čamodanua United-lendomatkoin järjestöh. Naine, kudai ruadoi täs pertis, kačoi minun čamodanan, kačoi dokumentat da andoi uvven – suuremban da paremban murennuon sijah. Minule se oli hyvä vuottamattomus. Kaiken ijän Ven’al eläjes duumaičin, ku minul kodvan vie tulou vuottua den’goi libo uuttu šalguu da ielleh matkata katkennuon čamodananke...  

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat