Vienan Karjala

Kirjutukset vienankarjalakse

Kurkijoven muinazet uardehet

Ozuttelun arvokkahimii eksponuattoi ollah 900 libo 800 vuottu tagaperin azutut naizien bronzučomendukset. Kaksi mygyrysolgie, rindusolgi, čiepit da čiepinkandajat riipuksienke oldih joga karjalazel inehmizel. Jygei rannehrengas (ykähän nelläs hurualpäi) // Kuva: Ol’ga Ogneva

– Tämä voibi olla muinaine kečoi. Sildy ku minul Kylälahtes yhtes kalmas oli tämänluaduine kečoi. Juuri luuhine, 1300-vuozilpäi, on varmu histourientiijon kandiduattu, piiteriläine arheolougu, antropolougien da etnogruafien muzein tiedoruadai Stanislav Bel’skii.

Yhtes Kirjaž-muzein johtajan Marina Petrovanke häi tarkendau ozutteluveššilöin igiä. Ilmai spetsialistan abuu on jygei sanuo, äijygo vuottu on rindusollel libo sormuksel.  

– Meijän muzeis oli toivomus luadie arheolougine ozuttelukabiniettu. Jo enämbi 10 vuottu myö kyzyimmö arheolougoi da paikallizii eläjii tuvva da lahjoittua meijän muzeile vahnoi veššilöi, mit on löytty Kurkijoven muas eri kylis, sanou Marina Petrova.

Kurkijoven enzimäzen arheolougizen ozuttelun vahnimil eksponuatoil on läs tuhat vuottu igiä. Arheolougat on pietty kaivavuksii Kurkijovel 1800-vuozien puolivälis algajen. Enzimäzinny tänne käydih suomelazet arheolougat Otto Hjalmar Appelgren da Theodor Schwind. Nygözis arheolougois kaivavuksii on pietty petroskoilaine Svetlana Kočkurkina da Stanislav Bel’skii Piiterispäi. Händy lykysti löydiä enne koskematoi kalmu Kylälahtes. Arvokastu veššii alalleh löytäh paikallizetgi eläjät omis pihois.

– Ezimerkikse tämä vešši, mygyrysolgi, on löytty Hämeenlahtes, kolmen kilometrin piäs tiäpäi. Hämeenlahti on vahnu, muinaine Kurkijoven kylä. Sie on Hämeenlahten Linnavuori. Paikalline Kurkijoven douhturi löydi tämän sollen omas pihas. Se on restavriiruittu Ermituažas, Marina Petrova ozuttau vahnua čomendustu. Tämänmoizii on livuttu luadimah nygöi. Niidy puaksuh suau nähtä, konzu neidizet da naizet sellitäh muinazih karjalazih sobih...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat