Vienan Karjala

Kirjutukset vienankarjalakse

Linna-keskus Kurkijovel

Linna-keskuksen kois Suomen aigua elettih Kurkijoven muatalovuskorgeiškolan opastujat. Jälgivuozin tiä oli Kurkijoven bol’ničču. // Kuva: Ol’ga Ogneva.

Suomen aigua täs kois elettih Kurkijoven muatalovuskorgeiškolan opastujat. Jälgivuozin tiä oli Kurkijoven bol’ničču. Sen salvattuu taloi seizoi tyhjänny, kuni Kurkijoki-nimine hyvyönluadiifondu ei vuogrannuh sidä Lahdenpohjan piirin haldivol. Paikallizen Kalaranta-kalankazvatuslaitoksen avul Kurkijoki-fondu rubei kohendamah vahnua bol’niččua. Enzimäzekse avattih luondalan ikkunazet da piästettih siepäi kai viet. Sit hil’l’akkazin ruvettih azumah uuzii lattieloi, lagiloi, puhtastamah seinii, panemah kundoh ikkunoi da uksii.

Nygöi tiä jo ruadau kul’tuuran kehittämizen Linna-keskus, kus pietäh ozutteluloi da juatah tieduo Kurkijoven istouries. Täkse päiviä Kurkijoki-fondu on kohenduttanuh da avannuh nelli enzimästy ozuttelupertii. Edehizes on ezil ennevoinallistu Kurkijoven fotokuvua, kudamat on suadu Suomespäi. Kahtes pertis ruatah väliaigazet ozuttelut. Nelläs perti on annettu lapsile.

– Myö olemmo pertis, kudaman avuandua vuotimmo yheksä vuottu. Tämän verran aigua myö piemmö Luadogan, Saimaan da Baikalan peitollizet tropat -projektua. Tiä nygöi on suurien järvien – Luadogan, Saimaan da Baikalan - ystävysmuzei. Myö sanelemmo lapsile luonnos, opastammo heidy vardoimah sidä. Konzu algaimmo projektan, tahtoimmo ozuttua lapsile, mittuine suuri on meijän mua – mittuine pitky matku on Luadogas Baikalassah. Ližäkse muailmas mageivezin’orpu eläy vaiku kolmes järves – Luadogas, Baikalas da Saimaas. Sendäh jo viizi vuottu myö ruammo yhtes Suomen luonnonvardoičenduliiton Lappeenrannan ozastonke, sanou Luadogu-Saimaa-Baikal -projektas vastuaju Vera Kovalenko... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat