Suomelas-ugrilastu kanzoinvälisty yhtehisty ruaduo meinatah jatkua

Vaigieh poliittizeh tilandeheh kaččomattah kanzoivälizet hommat ruvetah jatkumah. Suomelas-ugrilazien rahvahien liikeh on rauhuttu-tervehytty noudai, ei nimidä muudu pahua. Sen piätarkoitukset ollah rahvahien kielien, kul’tuuroin da omien eländykohtien tallendamine, kanzallizen omaničentunnon lujendamine. Nenis viehkois pieteltihes mennyöl kezäkuul suomelas-ugrilazien rahvahien VII Muailman Kongressasgi, kudai andau eduoigevukset kogo liikkehele.

Suomelas-ugrilazien rahvahien kanzoinvälizeh konsul’tatiivizeh komitiettah kuulujat Tatjana Klejerova, Zinaida Strogalščikova da Natalja Antonova yhtyttih paginah Karjalan tazavallan puolespäi. Meigäläine Tatjana Klejerova on vallittu komitietan paginanvedäjäkse mennyön Kongresan aigah – se on arvovaldaine virgu. Suomenpuolizien riävys oldih Suomi-Ven’a -seuran edustajat, Helsinkin yliopiston tiedomiehistyö, Suomen kul’tuurufondan piämiehistyö; Ven’an puoldu ozutettih suomelas-ugrilazien kul’tuurukeskuksien emändät Komis da Mordouviespäi, konsul’tatiivizeh komitiettah kuulujat rahvas.

Pagintaustannu oli kaksi lopuškahpäi menijiä suurdu projektua: ”Kanzalaisorganizatsiet suomelas-ugrilazii kielii da kul’tuuroi tallendamizes 2013-2016” (Konehen fondan rahoitettu) da ”Suomelas-ugrilazet kielet da kul’tuurat pienien lapsien kazvatandas 2013-2016” (Suomen kul’tuurufondaspäi varua suannuh). Mollembat ollah Suomi-Ven’a- seuran koordiniiruitut da molletit tavoitettih aktiviziiruija yhteiskunnallizien organizatsieloin ruandoneroloi, opastua spetsialistoi da informiiruija, mittumat voidas olla vähembistörahvahien menetelmät omien kielien piettelendäh da käytändäh niškoi...