Vienan Karjala

Kirjutukset vienankarjalakse

”Venäjän puistokuja” Petroskoissa

Petroskoin johtaja Irina Mirošnik issutti puun ”Venäjän puistokujalla”. // Kuva: Boris Kasjanov

Puijen taimenet, kumpaset simvolisoijah Venäjän Federatijon eri alovehie, korissettih kulkijan alovehta puistikošša Aleksandr Nevskin kirikön luona. Istorijallisella tapahtumalla tašavallan eläjie ta vierahie onniteltih Karjalan piämieš Aleksandr Hudilainen ta Petroskoin johtaja Irina Mirošnik.

Petroskoi on nelläš kaupunki, kumpasešša ilmešty ”Venäjän puistokuja” Koko Venäjän ekologiseh aktijoh, kumpani esittäy meijän muan eri alovehien eläjien yhteyttä, jo ošallissuttih Moskova, Vladivostok ta Sevastopol’. Aktijon järještäjinä ollah Venäjän luonnonresurssijen ministerijö ta Priroda-šiätijö.

Simvolisen allejan issuttamiseh keräyvyttih eri laitokšien ta järještöjen kollektiivit, lapšien ta nuorison yhissykšet, petroskoilaiset ta kaupunkin vierahat.

– Tašavallan 100-vuotispäivällä, kumpaista myö rupiemma juhlimah 2020 vuotena, on omissettu monta eri aktijuo, kumpaset autetah luatie Karjalua paremmakši. Mie toivon, jotta joka vuosi ta joka kuukauši myö rupiemma löytämäh idejoja ta eri projektijen toteuttamisen mahollisukšie Petroskoissa ta Karjalan piirilöissä, kiänty keräytynehien puoleh Karjalan piämieš Hudilainen.

A Petroskoin johtaja Mirošnik on varma, jotta ylpie Venäjän puistokuja -nimi pakottau kaikkie muistua, jotta puita issutettih kaikin yheššä ta kohella niitä hellävaroin.

– Toivon, jotta nuori polvi rupieu šuojelomah ta šiäštämäh meijän vihrietä pohasvuo. Tulkah meijän kaupunki aina kaunehemmakši, toivo Irina Mirošnik.

Aleksandr Hudilainen ta Irina Mirošnik avattih muistotaulun, mi on kiinitetty kiveh puistikošša Aleksandr Nevskin kirikön luona.

Juhlaseremonijan jälkeh kaupunkilaiset issutettih 64 taimenta, kumpaset simvolisoijah Venäjän eri alovehie. Petroskoin ”Venäjän puistokujašša” ruvetah kašvamah kalinat, sirenit, tulipenšahat, koivut, lehmukšet, meččävuahterat. Piämieš Hudilainen issutti Karjalan simvolin – visakoivun.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat