Vienan Karjala

Kirjutukset vienankarjalakse

Käzineruo keskilinnal

Ksenija pidäy käis iččeni mualattuu villulangua, kuduan nimi on ”Danu”, kui antikafeelgi. // Kuva: Ol’ga Dubitskaja, “Oma Mua”

Kafeen toimindas

Danu-nimine (paino enzimäzele tavule) antikafe sijaiččou juuri linnan keskukses – Leninan pihal, Oniegan järven rannan lähäl. Pieneh podvualah tulduu sinuu ottau vastah rouzankarvaine tukku nuori inehmine. Tämä muhizii naine on Ksenija Komissarova, Danu-antikafeen alguhpanii.

Ksenija piätti luadie antikafee mennyön vuvven lopus, da jo sulakuus algajen se ruadau. Danu-kafees voibi ostua kuvondulangua, nieglua, kočkastu da muudu tavarua nieglomizeh niškoi. Iče Ksenija nieglou jo läs kymmendy vuottu. Häi nieglou jogahizele, ken tahtou ičelleh nieglottuu sobua libo vehkehty. Ksenijale suuri probliemu ainos oli löydiä hyviä kuvondulangua, sendäh häi algai kezrätä da mujuttua langoi iče. Nämmii langoi voibi ostua Danu-antikafees. Kai nämmä langat on kezrätty luonnollizis materjualois.

Paiči langoin ostandua, antikafees suau opastuo nieglomah kočkal libo niegloil. Ksenija Komissarova pidäy urokkoi, kursiloi da master-kluassoi. Paiči sidä muut neroniekat pietäh sie eriluaduzii master-kluassoi – kanzaši-kukkua, dekupažua, kirjondehtu, tvistingua, feltingua da muudu.

Ksenijan kursiloile da master-kluassoile kävväh ei vaigu naizet, kerran oli kaksi miesty.

Pidäy mainita, ku ”Danu” on enzimäine moizen formuatan antikafee Ven’al. Olemine täs kafees maksau 2,5 rubl’ua minuutas libo 150 rubl’ua čuasus. Sie on olemas stop-ček. Se tarkoittau, ku maksandu yhtes päiväs ei voi olla enämbiä 500 rubl’ua, hos kogo päivän ole sie.

Kafees, paiči Ksenijua, ruadau vie yksi inehmine, kudai avvuttau Ksenijale myvvä tavaroi nieglomizeh niškoi...

 

Pieni pakičus

Ksenija, paiči nieglondua, vie iče kezriäy villua. Hänele on ylen mieldy myöte karjalaine rukki, ga häi nikus ei voi sidä ostua. Toinah keltahto kyläs vuiškal libo aitas löydyy rukki. Ksenija hyväs mieles ostas moizen.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat