Vienan Karjala

Kirjutukset vienankarjalakse

Militsiisuguh kuului karjalaine politsiimies kuristas zakonoi

Vieljärveläine politsiimies Igor’ Stafejev sluužiu alan hyväkse vuvves 1997 algajen. // Kuva: Kuva on otettu Stafejevien pereharhiivaspäi

Kilvan voittajii vallittih rahvas internetan kauti kaiken sygyzyn aigua, kahteh vuoroh. Panna oman ogalazen sai jogahine ministerstvan internet-sivustol čökkelii. Täs kilvas pidi vai iänestiä kudamasgi kandiduatas painaldajen hänen fotoh, muudu nimidä. Sotsiuallizis verkolois kerran sai nähtägi kuhkutustu, ku vieljärveläine Igor’ Stafejev on karjalaine mies, karjalan kieldy pagizii. Pagizutammo kunnivonhimottomua nellikymmenvuodehistu politsien kapituanua “Omah Muah” niškoi. Liigua sanua häi ei löyhkä, meijän paginat ollah lyhyöt, dieluo myöte. Rinnal hyväs mieles hypitteleh On’a-poigah, ryndähäs – tuatan lunnastetut medalit.

– Igor’, kuibo puutuit kilbah? Omuago veguo myöte? Sano tottu.

– (Muheloittau). Täh kilbah puuttujes ei sua olla ni yhty rikkovustu da vigua omas ruavos. Kogo Priäžän rajonas lövvyin minä, nevol’as sit lähtet. Enzimäzeh vuoroh iänestettih kahteskymmenes politsiimiehes ymbäri Karjalua, toizel kerdua iänestettäväkse piäzi viizi. Minus iänesti 74 hengie, olen kolmandel sijal. Passibo kannattajile.

– Sinun ruado Vieljärven paikkukunnas on kuulužimii da tärgiembii. Politsiimiehel pidäy pyzyö ainos jalloil. Sanele, kui puutuit täh ruadoh.

– Sluužimas minä olen läs kahtukymmendy vuottu. Armien jälles kodvazen ehtin ruadua sovhouzas traktoristannu, enzimästy professiedu myöte olen avtoslesari. Sit lopin Karjalan tazavallan syväinazieloin ministerstvan opastuskeskuksen kursit da sluužin avtoinspektorannu. Välil lopin Ven’an syväinazieloin ministerstvan Piiterin yliopiston, zakonoinvalvonduelimien juristizen alan juristakse tulin. Učastkouvoinnu olen jälgimäzet nelli vuottu. Sanakse mainiččizin, minun died’oi Mihail Stafejev sluuži militsienny nämmil agjoil enne voinua. Voi olla sidä veguo minägi täs riävys olen... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat