Vienan Karjala

Kirjutukset vienankarjalakse

Paras kohtu muailmas

Salmenniemel Vilho Aino-emändänke kävväh nelli-viizi kerdua vuvves da iče pietäh hyväs kunnos kodii da pihua ilmai kenentahto abuu. // Kuva: Ol’ga Ogneva.

Vilho Heinonen vietti kuldazet lapsusvuvvet tiä, Vätikäs, Luadogan rannoil. Heinozen perehes oli kuuzi lastu, Vilho vahnin. Koit da konnut pidi jättiä vuvvennu 1940, Suomen, libo talvivoinan loppuhuu. Silloi Vilhol oli 12 vuottu igiä. Tuatan tapoksele mies tuli järilleh hedi, ku sai tulla da vuograta muadu. 

– Oli ylen igävy kodii, roindumuadu. Sendäh tulin. Tulimmo tänne gruuzuautol tämä kodi keral. Ajoimmo rajas poikki 17. heinykuudu 1992 da pystytimmö täh kohtah tagan olijan mökin, sanelou Vilho.

Myö istummo pihas, koin očas. Ies on Luadogu, kaižlikkorandu da pitkät telat järvele. Enne randu oli puhtas, heiniä ei kazvanuh, nygöi kai on toizin. Ymbäri kazvau koivuu da kuustu, niilöin al – valgiedu gribua. Vätikkä ainos oli pieni kylä. Vilhon lapsusvuozinnu tiä oli vai kaksitostu taloidu. Nygöigi on sen vastah, järvirandah on nostettu suurembua da pienembiä kezäkodii.

Tänne, Salmenniemel, Vilho Aino-emändänke, kudaman juuret ollah sežo lähäl, Räihävuaras, kävväh nelli-viizi kerdua vuvves, talvel dai kezäl. Viijensuan kilometrin matku ei ozuttai pitkäkse, konzu ajat kodimuale. Vilho da Aino iče pietäh hyväs kunnos kodii da pihua ilmai kenentahto abuu. Tiä kazvau juablokkupuudu, mustua čihoidu, kukkua, kai vagoine kartohkuagi, kai heinät on niitetty, ižändy iče luadiu halguogi. Ei uskotuta, ku Vilhol on jo 88 vuottu igiä. Mies on vie hyväs tories, sanou, sildy gu ijän on ruadanuh mečäs.

– Täs on olluh mielehisty ruaduo, istutimmo puudu, muhahtah Vilho. Hänen läs 25 vuottu tagaperin istutetut kuuzet ollah jo aiga pitkät. Net suahah kylläl lämmiä, valgiedu da vetty. Sendäh vuvves ehtitäh kazvua aiga suuren palan. Vuozikazvu nägyy rungos: yksi vuozi – yksi oksienväli... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat