Vienan Karjala

Kirjutukset vienankarjalakse

Alavozen bes’odal

Illačun gost’at – Kuittizen kylän artistat. Kuvan työndi Valentina Libertsova.

Ei sua sanuo, ku kaikin juostozil tuldih sih pidoh, ga kudakui ristittyy kerävyi. Enzimäzikse ozutettih omii neroloi Kummazet-pajojoukon naizet, sytytettih syväimet vesselil da hengellizil pajoloil.

Sit Tatjana Ivanova saneli Käzinluajittu Anuksen mua -ozutteluh näh, kudai ei ammui avavui Petroskoin Käzineroloin talois. Sih on suadu läs kolmenkymmenen Alavozen neroniekan eriluadustu vehkehty, kai ollah čomat, pädevät joga kylän dai linnan pertih täl aijalgi. Iče kuulin Karjalan piälinnan laukois da pihal, kui ristittyöt kiitettih sidä ozutteluu da potakoittih toizii kaččomah sidä.

Mustoitti Tatjana Borisovna vie, midä ruattih koivuvastanke meijän rannoil Sroičan- da Iivananpäivin, kui tiedovoittih tervehytty da ozua kaikekse vuvvekse.

Oli mielihyvä nähtä vahnembien keskes ihan nuorii tyttözii da brihaččuloi, kuduat tarkah kuunneltih karjalazii sanomizii. Net oldih Nuoret tuulet – volont’ouroin joukkoh kuulujat. Hyö vastavuksele varustettih uuzi tansi – “Karjalaine kadrieli”.

Illačule gost’annu tuldih Kuittizen kylän artistat Irina Sergejeva, L’udmila Lekkojeva, Nikolai Vlasov, Al’ona Fiošina. Hyö ozutettih ozutelmu Vladimir Brendojevan Kaglakkai ištundu -kerdomustu myö. Kuittizen kyläs vie tässäh talolois paistah livvikse, mustellah Vladimir Brendojevan eländyaigua, sie seizou kodi, kuduas eli meijän enzimäine livvin runoilii... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat