Vienan Karjala

Kirjutukset vienankarjalakse

Olimpijamainehen kävelykuja Petroskoissa

Karjalan olimpijamaineh -urheilukujan renkahien šiämeh on ašetettu tiijotuštaulut, kumpasissa on tietuo ta kuvie karjalaisista olimpijavoittajista.

Avajaispitoh otettih ošua Venäjän Federatijon urheiluministeri Pavel Novikov, VF:n Valtijon Duuman deputatti ta talviolimpialaiskilpailujen voittaja Vladimir Dračev, Karjalan urheiluministeri Aleksandr Voronov, Karjalan enšimmäisen olimpijavoittajan hiihtäjä F’odor Terentjevin vellentytär Nadežda  Terentjeva šekä eri vuosien Olimpijakisojen voittajat, ošallistujat, valmentajat ta urheiluveteranit.

– Urheilukujan avajaiset on Kurganin musejo- ta urheilukompleksin šuuren rekonstruointityön viimeni oša.  Tämä työ oli alotettu muutoma vuosi takaperin ta nykyjäh tiälä on luotu hyvä nykyaikani keškuš, missä voit harraštua hiihtuo ta ampumahiihtuo. Kuitenki työ ei tähä lopu – jatkošša tällä alovehella on meininki rakentua hotelli šekä šukšien hoitopaikat. Karjalašša on hyvät urheiluperintehet, Pavel Novikov korošti pakinaššah.

Lillehammerin 1994 vuuvven XVII Talvioplimpijakisojen hopien voittaja šekä XVIII Olimpijakisojen pronššivoittaja Naganošša 1998 vuotena, KASNT:n šivissyšministerin lapšien urheilukoulun kašvatti Vladimir Dračev šuurella lämmöllä muisteli omua tašavaltua:

– Nelläkymmäntä vuotta takaperin mie hiihtelin näillä paikoin ta olen onnellini, kun nyt tiälä on noššettu šemmoni šuuri urheilukompleksi. Olen varma, jotta Karjalan nuoret hiihtäjät ruvetah näyttämäh tiälä omie nerojah. A urheilukuja rupieu šäilyttämäh muistuo niistä, kumpaset tuomalla olimpijavoittoja luajittih Karjalan kuulusakši.

Karjalan olimpijamaineh -urheilukuja on rakenneh, kumpani on luajittu viiještä olimpijarenkahan muotosešta modulista. Olimpijarenkahien modulit on kiinitetty beronijaluštoh ta värjätty olimpijalipun värilöih. Renkahien šiämeh on ašetettu tiijotuštaulut, kumpasissa on tietuo ta kuvie karjalaisista olimpijavoittajista.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat