Vienan Karjala

Kirjutukset vienankarjalakse

Vieljärven ”Tähkäine”

Vieljärven školan karjalan kielen opastajannu Julija ruadau jo kolmattu vuottu.

Tähkäine-teatru on perustettu vuvvennu 2015. Sen ohjuajannu da alguhpanijannu on nuori vieljärveläine karjalan da suomen kielen opastai Julija Ponomar’ova. Konzu Julija opastui Petroskoin valdivonyliopistos, häi iče kuuzi vuottu kävyi karjalazeh Čičiliušku-tyttiteatrah. Yliopiston loppiettuu, häi tuli järilleh roindukyläh Vieljärveh školah ruadamah. Školas Julija ruadau jo kolmattu vuottu vuvves 2014.

Vuvvennu 2015 Priäžän kyläs piettih Karjalaine suarnu -festivuali, kuduah yhtyttih Julijan opastujat. Silloi hyö ozutettih Kirjavu kanaine -tyttispektaklin. Muga oli pandu alguh Vieljärveh Tähkäine-tyttiteatru.

Täl aigua teatrah kävyy konzu viizi, konzugo seiččie hengie. Juuri nygöi teatras valmistetah Jänöin kyynälet -spektakli. Hos teatras on kaikkiedah kaksi spektaklii, ga net ollah karjalan kielel.

Julijan ičeksehopastundan tiemannu on kižamuodoloin käyttämine karjalan da suomen kielen urokoil. Teatru avvuttau Julijale ičeksehopastuo da opastua lapsii karjalan kieleh. Teatran ohjuajan mieles opastua kieleh kižaten on kebjiembi da vesselembi.

Pidäy sanuo, ku neidine ruadau teatras ilmai palkua. Da häi iče, omah den’gah ostau tyttilöi spektaklih niškoi.

– Širman luajimmo ”kogo kyläl”, sanou Julija. – Muamo andoi materjualua, tuatindam laudua pilai, käziruavon urokan opastai yhtes opastujienke kerättih širman da lapset kriepittih sih materjualu. Enzimäzes spektaklis meil nimidä, paiči širmua, ei olluh. Jänöin kyynälet -spektaklih näh myö tahtommo iče luadie dekoratsiet – kodi, kuuzet da muudu...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat