Vienan Karjala

Kirjutukset vienankarjalakse

Kirjuttamal kehittiä kieldy

Nuorien kirjuttajien kilbah yhtyi nuordu dai vahnembua, kieldy lapsennu opastunuttu da niidy, ket vaste korgies školas ruvettih sidä opastumah. // Kuva: Ol’ga Dubitskaja, “Oma Mua”

Kanzallizen poliitiekan ministru Andrei Manin avai pivon da sanoi, ku sih huolimata ku Karjalas on 80 kanzallistu yhteiskunduliittuo, virgumiehet ainos mustetah, ku meijän tazavallas eläy kogo Ven’an 75% karjalastu, 65% vepsälästy da 42% suomelastu.

Ministran sanoin mugah nuorien kirjuttajien kilvan tarkoituksennu on parandua karjalakse, vepsäkse da suomekse kirjuttajien neruo da samal aigua kehittiä karjalan, vepsän da suomengi kieldy.

Allus algajen oli piätetty, ku tämänmoizii kilboi ruvetah pidämäh kerran viijes vuvves, ga ministru Maninan mugah sidä vie duumaija, ku kilbah yhtyi muga äijy kirjuttajua da tulokset ollah moizet hyvät.

Tämän vuvven kilbah omat kirjutukset työttih kaksitostu karjalastu, nelli vepsälästy da nelli suomekse kirjuttajua. Arvostusjoukko kačoi da arvosti niilöi kirjuttajien nimii tiedämätä. Vaste arvostusjoukon jälgimäzes istundos sen piälikkö, ministerstvan piälimäine spetsialistu Jelena Migunova “pal’l’asti kaiken toven”. Arvostusjoukkoh kuulujat vie kogonazen nedälin oldih vaikkaine da ei ilmoitettu kilvan voittajien nimilöi.

Vepsäläzien puolies arvostusjoukos ruadanuh Marija Filatova uskoitti kaikkii pivos olijoi, ku ei omal, yliopistos opastetul kielelgi voibi kirjuttua hyviä da mieldykiinnittäjiä kirjutustu.

Natalja Sinitskaja, kudai sežo kuului arvostajien joukkoh, kehoitti kilbah yhtynyzii painatuttamah omii runoloi da prouzukirjutuksii kanzalliskielizis lehtis. Erikseh häi kiändyi lyydiläzien puoleh:
– Aivin opimmo kuhkuttua lyydiläzii työndämäh omii kirjutustevoksii “Omah Muah”. Käyttäkkiä oman ičen da oman kielen hyväkse sidä mahtuo, kuduan teile andau valdivo – kirjuttakkua karjalankielizeh lehteh, lugekkua omal kielel.

Kielen, literatuuran da histourien instituutan ruadai Natalja Čikina hyväkse pani sen, ku kilbah yhtyi sen verdu nuordu da potakoičči heidy jatkamah kirjuttamistu.

Jälgimäi oldih ilmoitettu voittajien nimet. Livvinkarjalazien keskes parahakse oli sanottu Anna Usova da hänen kirjutetut runot. Enimäl toizii arvostusjoukko kiitti runuo “Vahnu časounu”. Anna 25 vuottu ruadau Karjalan raadivos da valmistau karjalankielizii literatuuruprogrammoi. Hänen kirjuttamine algavui kiändämizes.

– Ku pajatan Oma Pajo -horas, gä rubein enzimäi kiändämäh suomen- da ven’ankielizii pajoloi karjalakse. Sit jo rubein iče runoilemah. Oma mua, oma randu ainos ollah mieles da runolois, sanou naine...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat