Vienan Karjala

Kirjutukset vienankarjalakse

“On vägie kirjuttamah, istumah airolois da ongittamah riäpöidy Siämärves”

Vuvvennu 2013 oman 85-vuozipäivän pivos Aleksandr Volkov sai kerras kaksi uuttu arvonimie “Karjalan rahvahan kirjuttai” da “Karjalan tazavallan vuvven ristikanzu”. // Kuva: Ol’ga Smotrova, “Oma Mua”

Minä runolois olen gu ruadai,

Minun pajolois – argiloi näit.

Minä rakastan rahvastu, muadu

Minun runozet – Karjalah näh.

 

Aleksandr Volkovan nimi on hyvin tuttu nygyaigazile lugijoile ei vaigu Karjalas eläjile, ga sen ulgopuolelgi. Ven’akse runoilemah allettuu da karjalan kirjukielen kehitettyy Volkov kogonah andavui oman rahvahan puolistamizele. Jessoilan kyläh rodivunnuh mies 1990-luvun allus rubei kirjuttamah tevoksii karjalan kielen livvin murdehel.

Hänen enzimäine kniigu “Mal’en’kaja Dessoila” piäzi ilmoih ven’akse vuvvennu 1993, nellän vuvven peräs lugijat nähtih sen samazen kniigan karjalankielizennu – “Pieni D’essoilu”. Aleksandr Volkovan “runoperindö” on aiga suuri, semmite ku otammo huomivoh sen pienen aiguvälin, kuduan se oli luajittu. Runoilii myöhä polgi kirjalližustaibalehele. Konzu oli painettu Volkovan enzimäine kniigu, hänel oli jo piäl kuvvenkymmenen.

Häi rounoku kiirehti sanuo kai, midä suitti vaikkaine olles. Joga uvves kniigas lugii oli rounoku paginkanzu, kudamale runoilii sanelou kaikis tärgevimis tundolois: oman rahvahan ozas, oman kielen elavuttamizes, toiči kerdou omas elaijas da nevvou.

“Iguine tuli”, kudai piäzi ilmoih vuvvennu 1998 sanelou Karjalan ozas, rounoku “Livvin virret”, kudai kuuluu kogo suomelas-ugrilazes muailmas. Ihaškoitetah kui ennegi “Järvet Karjalan”, hos ongi jo “Myöhäine sygyzy” da silmii ainos vai puaksumbah nostat “Hil’l’azeh taivahah”, ga runoilii endizelleh on “Venehes”.

Aleksandr Volkov suitti runoneruo ven’ankielizien runoniekoin tevoksii kiändäjes – Sergei Jesenin, Aleksandr Jašin, Nikolai Rubtsov, Jevgenii Jevtušenko, Andrei Voznesenskii da toizet. Tämän suuren ruavon tuloksennu rodih kniigu “Ven’an runot” vuvvennu 1998 da “Vellen syväin”, kudai piäzi imoih vuvvennu 2001. Vuvvennu 2009 Tallinnan linnas oli painettu Alekandr Volkovan runoloin eestinkieline kiännöskniigu “Hilissügis”...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat