Vienan Karjala

Kirjutukset vienankarjalakse

Ristilahten tora

Vuvvennu 2014, konzu Ristilahten toras meni 400 vuottu, Kurkijoven Kirjaž-nimizen kodirannankeskuksen da muzein ruadajat azetettih Ristilahten toran mustolaudu Kirjaž-muzein pihah. // Kuva: Ol’ga Ogneva “Oma Mua”

Vuozi 1614 oli ylen jygei Ven’al. Rauhattomal segasotkun aigua suari Boris Godunovan kuolendan jälles suuret joukot kaikenalazii vierahanmualazii šeikkailijoi, avant’uristoi täytettih Ven’an. Toine toizen peräs jiävittihes valehnimie kandajat miehet, kuduat tahtottih suaha Ven’an valduistuimen.

Enin pidi varata pol’akkoi, kuduat valloitettih suuret palat Ven’an muadu, ryöstettih da tapettih äijän paikallistu rahvastu.

 

Kallehel suadavu Ruočin soda-abu

Ku kerran Ven’al ei olluh voimakastu keskusvaldua, pidi ottua abuh palkusodajoukkoloi. Vuvvennu 1609 kniäzi Mihail Vasiljevič Skopin diädäh Vasili Šuiskoin käskys, kudai sih aigah oli Ven’an suarinnu, allekirjutti Viiborgas sobimuksen Ruočin kuningahanke soda-abuh nähte pol’akkoi vastah. Tämän sobimuksen mugah Ruočin kuningahal pidi andua viizi tuhattu sodamiesty da kymmeneh tuhandessah omatahtostu, ket tahtottih lähtie sodah omal vallal. Täs ven’alazil pidi maksua kuningahale 32 000 rubl’ua kerras, da sen piäl vie maksua alallistu jengupalkua ruoččilazile sodajoukkoloile. Sobimuksen peittoližävykses oli sanottu, ku ruoččiloil soda-avus olis pidänyh suaha Korelan ujezdu Korelan linnanke (nygöine Priozerskan linnu).

Keviäl vuvvennu 1609 ruoččilazet sodajoukot tuldih Novgorodah. Heijän johtajannu oli ruoččilaine sodapiälikkö Jakob Delagardi.

Ruoččilazet sodajoukot toven autettih torata pol’akkoi vastah, sendäh gu Ruočči sil aigua sežo oli sovas Pol’šua vastah. Omien sodajoukkoloin varustukseh niškoi ruočit sijoitettih omat garnizonat monih Ven’an luodehen linnoih. Toiči garnizon azetui linnah sen valloitettuu, ga puaksumbah linnat iče kyzyttih ruoččiloi jättiä linnah garnizon. Se puolisti linnalazii luguzis rozvoloin joukkolois, niidyhäi sil aigua käveli Ven’an mual hos kui äijy. Jakob Delagardi johti omii joukkoloi Novgorodaspäi...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat