Vienan Karjala

Kirjutukset vienankarjalakse

Jevgenii Jevtušenkon mustokse

Jevgenii Jevtušenkon elaigu da luomisruado on kingiesti sivottu Karjalah. Häi puaksuh kävyi literatuuruinstituutan tägäläzillyö dovarišoilluo, Kižin suarele, Anukseh. Karjalas Jevgenii Jevtušenko löydigi oman Maša-mučoin, täs häi alalleh lugi omii runoloi.

Omii mielii Ven’ah nähte runoilii sanoi muga: Runoilii Ven’al on enämbi, migu runoilii. Täs sanondas rodih hänen taibalehen tiähti. Monis kyzymyksis Jevgenii rohkieh saneli omii mielii, sanommo, häi oli vastah Afganistuanan voinua, kuduan aigua kuoli tuhanzii ven’alazii saldattoi. Häi täytty vägie puolisti Aleksandr Solženitsinua. Jevtušenkon nerokkahat runoelmat da parahat runot säilytäh ilmazekse igiä.

Eräs minun elaijan ozakkahis kodvazis oli vastavus Jevgenii Jevtušenkon kel kezäkuus vuvvennu 2009. Myö vastavuimmo yliopiston pruazniekkuzualas, kuduas häi läs kahtu čuassuu lugi omii runoloi. Tiettäväine, häi väzyi da nikenen kel ei tahtonuh paista. Kniigu käis minä yksikai piäzin hänen luokse. Jevgenii sanoi “nouze lavale”. Sit minä lahjoitin hänele ven’alazien runoilijoin tevoksien kiännöskogomuksen nimel “Vellen syväin”. Täs kniigas oli minun karjalakse kiännettylöi Jevtušenkon runokolliegoin tevoksii – Marat Tarasovan da Vladimir Morozovan. Tiettäväine, Vellen syväin -kogomukses ongi Jevtušenkon runoloi, Minul Karjalu lahjai Mašan -runogi. Hänespäi minä sain vuottu aijemba Karjalas ilmoih piästetyn suuren kniigan, Jevtušenko kirjutti minule mustokse: “Volkovan Sašale – runovellele”. Algusanat kniigoih niškoi allekirjutti Karjalan tazavallan silloine piämies Sergei Katanandov. Algusanoin jälles tevoksen luadii kerdou vastavukses Mašanke da heijän yhtehizes elaijas. Kniigan enzimäine runo on “Jälgimäine yritys”, kuduan iel on moine epigrafu: Mašale, kudai sit aijas, konzu oli kirjutettu tämä runo, lahjoitti minule kaksi poigua – Žen’an da Mit’an”. Kogomuksen nimi on “Minul Karjalu lahjai Mašan”, a enzimäzen luvun nimi on “Runoloi Karjalah nänte”... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat